Удмуртилэн нуналэз ортчиз Венгриын

Удмуртилэн нуналэз «Калыккуспо тулыс» ужрад улсын радъяськиз. Отчы пыриськисьёс элькунмы но татын улӥсьёс сярысь Миклош Дэметэрлэн туспуктэмъёсын «Удмурт куазь но адямиос» адӟытонэз пыр тодматскизы. Тодэ вайытом, Миклош Дэметэр ас вакытаз Удмурт кун университетын мадьяр кыллы дышетӥз, нош кылем арын Ижкарын нырысетӥ Кубыз фестивале пыриськиз.

Сегед университетысь мадьяр кылъя кафедраысь лектор Екатерина Сунцова Удмуртилэн кунпусъёсынызы тодматӥз, удмурт но мадьяр кылъёсын огкадез, озьы ик йӧскалык эктонъёс, кырӟанъёс но йылолъёс сярысь вераз.

Печысь университет Удмуртилэн шоркареныз кусыпъёссэ кемаласьгес юнматӥз ни — нырысь ик М. Т. Калашников нимо техникая кун университетэн, Венгриысь студентъёс татчы стажировкае вуыло. Мадьяр кылъя но этнографияя кафедраысь дышетӥсьёс Удмуртие фольклорез эскерыны ветло. Нош егитъёс Удмурт кун университетэ удмурт кылэз дышетонъя гужем школае пырисько, удмурт йылолъёсын, эктон-кырӟанъёсын тодматско.

https://udmurt.media/udm/news/obshchestvo/53269/