Инкуазьлэн гурез

«Виль Шы» крезьгуро проект коми-пермякъёслэсь калык сям-йылолъёссэс выльдон луэ. Татчы туала этнической крезьгурез шудӥсьёс люкаськемын. Проектэ Ижкарысь, Кудымкарысь, Пермьысь музыкантъёс пырисько.

Огласянь, проект коми фольклорез уте, мукет ласянь, коми калыклэсь лулчеберетсэ мукет калыкъёслэн лулчеберетэнызы узырмытэ. Проектэ пыриськисьёс коми-пермяк фольклорысь кырӟанъёсты, лыдъяськонъёсты африкан джембеен но кахонаен, башкир кураен, манси санквылтапен но мукет крезьгуро инструментъёсын огазеяло — инкуазьлэсь гурзэ кисьто кадь.

Проект калыкез вашкала вакытъёсы вуттэ кадь. Чильпырась куара, аспӧртэм крезьгур кылзӥсез соку ик нюлэскы нуэ. Татын ини адями аслэсьтыз кужымзэ, кин луэмзэ, инкуазен юн герӟаськемзэ шӧдэ.

Проектэз Президентлэн грантъёсызъя фонд улонэ пыӵатыны юрттӥз. Со улсын 2018-тӥ арын «Виль Шы» проект коми-пермяк кылын кырӟанъёсын альбом поттӥз. Альбоме, коми-пермяк кылын 12 кырӟан сяна, электронной крезьгурен вырись SaidDig (Владислав Цыганов) ди-джейлэн 3 экспериментальной крезьгурез пыртэмын.

Проектлэн малпасез Вера Мехоношина — тодмо коми дизайнер но «ГОРТ» творческой мастерскойлэн кылдытӥсез. Проектлэн кураторез Марина Белавина Коми-пермякъёслэн этнокультурной центразы, культурной но социальной проектъёсты азинтонъя «АРТкад» центрын ужа.

2018-тӥ арын «Виль Шы» Россиысь калыкъёс пӧлын ортчем «Живая нить» крезьгуро вожвылъяськонын 2-тӥ инты басьтӥз. «Россия: этнический комфорт» национально-культурной проектъёс куспын вожвылъяськонын 3-тӥ степенё лауреат луиз.

https://udmdunne.ru/