Грандъёсъя конкурсъёсы проектъёсты дасяны юрттэт сётонъя семинар ортчиз

Ужрадэ пыриськизы йӧскалык кусыпъёсты но осконэн герӟаськем учконъёсты юнматон ужпумъёслы сӥзем проектъёслэн авторъёссы. Пумиськонэз нуиз Калыкъёслэн Эшъяськон юртысьтызы проектъёсын ужез радъянъя ёзэтэн кивалтӥсез Лариса Князева.

Люкаськемъёслы со вераз ӵектосъёслы куриськон гожтонын ӵемгес пумиськылӥсь янгышъёс сярысь: вожвылъяськонлэн куронъёсызлы пуктэм ужпумъёс уг тупало, проектэз улонэ пыӵатыны кулэ луись коньдонэз уг пусъё, ӵектосэ пыриськисьёс гожтэмын уг луо.

Лариса Князева нимысьтыз саклык висъяз «Культурная мозаика малых городов и сёл» конкурсэ куриськонъёс гожтонлы. Сое радъя Елена но Геннадий Тимченкоослэн ӟеч уж лэсьтонъя фондзы.

Вожвылъяськонэ пыриськись мерлыко но лулчеберетъя проектъёс пичи каръёслы но гуртъёслы  азинскыны луонлык сётон вылысь кылдытӥсько.

«Культурную мозаику малых городов и сёл-2019» конкурсэ куриськонъёсты 15-тӥ толсурысен кутыны кутскизы, йылпумъяськоз 4-тӥ южтолэзе.