Удмурт лулчеберетлэн нуналъёсыз ортчозы Киров улосвылын

Удмурт лулчеберетлэн нуналъёсаз Киров улосвылысь мер огазеяськонъёсы пыриськисьёс, дышетӥсьёс но удмурт лулчеберетэз дышетӥсь-эскерись пиналъёс но творчествоя йӧскалык коллективъёс пыриськозы.

Форум Удмуртиысь творчествоя коллективъёслы но Россиысь мукет улосвылъёсын улӥсь удмуртъёслы тодон-валанэнызы люкиськыны но кусыпъёссэс юнматон вылысь радъяське. Со сяна, пумиськон егитъёсты удмурт калыклэн сям-йылолъёсыныз матэгес тодматыны луонлык сётоз.

Ужрад кык нунал кыстӥськоз. 20-тӥ тулыспалэ форум Киров карын Калыкъёслэн эшъяськон юртазы радъяськоз. Отын «Киров улосвылын удмурт лулчеберетэз но кылэз утён но азинтон» темая котырес ӝӧк ортчытыны чакламын. Бӧрысь пыриськисьёс «Кыккылолыкъем дышетон: луонлыкъёс, амалъёс», «Егитъёслэсь ӵектосъёссэс улонэ пыӵатон опыт» но «Клубъёслэн калык лулчеберетэз утён бордын ужзы» секциосын ужалозы.

21-тӥ тулыспалэ ужрадэз радъясьёс Киров улосвылысь Слободской ёросын пумиськонъёс ортчытозы. Отын соос ёросысь школаосын дышетскисьёсын но дышетӥсьёсын пумиськозы. Озьы ик «Кыккылолыкъем дышетон: луонлыкъёс, амалъёс», «Дышетскисьёс понна «Шудком» визьбур шудон» но «Дышетскисьёс понна удмурт эктонъёсъя мастер-класс» секциос ужалозы.

Секциосты нуозы Ижкарысь Кузебай Герд нимо йӧскалык гимназилэн кивалтӥсез Татьяна Волкова, калык эктонъя «Чебеляй» студилэн кивалтӥсез Наталья Чиркова но мукетъёсыз. Со сяна, элькунысьтымы но Киров улосвылысь коллективъёслэн концертъёссы ортчозы.

Тодэ вайытом, толшоре Киров улосвылысь Вятские Поляны карын «Бускельёсын пумиськон» фестиваль ортчиз.

https://udmurt.media/udm/news/obshchestvo/51180/