Россиысь финн-угор калыкъёслэн ассоциацизылэн кенешонэз ортчоз Ижкарын
Кызьы вераз «Удмурт Кенеш» огазеяськонлэн кылкутӥсь секретарез Елена Александрова, Удмуртиысь ёзчиосты лыдэ басьтыса, ужрадэ 16 адями пыриськоз.
Карелиысь, Комиысь, Марий Элысь, Мордовиысь, Ненец автоном округысь, Пермь шаерысь но Удмуртиысь мер огазеяськонъёслэн ёзчиоссы, озьы ик тӧрлыкъёслэн ыстэм муртъёссы, экспертъёс Удмуртиын улӥсь финн-угор калыкъёслы аспӧртэмлыксэс утьыны юрттон ужпумъёсъя вераськозы. Солэсь азьвыл удмурт югдытӥсьлэн Кузебай Гердлэн синпелетэз доры сяськаос понозы.
Кенешон бере делегатъёс Удмурт кун университетлэн лыдӟетъюртаз, Кузебай Герд нимо гимназие, Чеберлыко киужъёсъя йӧскалык центре ветлозы. Нош 16-тӥ тулыспалэ «Лудорвай» музей-заповеднике поталозы.
Ватсалом, ар талэсь азьвыл Ассоциацилэн азьвалтэтэзлэн кенешонэз Йошкар-Олаын ортчиз. Отын Марий Элын улӥсь финн-угор калыкъёслы юрттэт сётон сярысь вераськизы.
ВАТСАН
Росси Федерациысь финн-угор калыкъёслэн ассоциацизы – 1992-тӥ арын кылдытэм мер движение. Ужпумез – финн-угор калыкъёслэсь эрикрадъёссэс но тунсыкъёссэс быдэстонын юрттэт сётон, мерлыкъя но экономикая, лулчеберетъя но ивортодэтъя огъя вӧлмет кылдытонлы луонлыкъёс усьтон.