Ижкарын «Нылкышно дунне. Выл дӥськут. Удмурт чильпырет» адӟытон ужа

Ар ӵоже уйпал но лымшор ёросъёсысь кибашлыос тодматскизы сандыкын кыллись вашкала выл дӥськутэн но удмурт чильпыретэн. 20 ёросъёсысь 50 пала кибашлыос пӧртэм семинаръёсы, мастер-классъёсы пыриськизы , суредъёсын, музей фондъёсысь экспонатъёсын тодматскизы. Трос тодон-валан соослы сётӥзы гурт экспедициос.
 
«Ми паймим, кыӵе но кӧня пӧртэм дӥсьёс вылэм удмуртъёслэн, — шуэ адӟытонэз радъясь Наталья Прокопьева. — Пичи гинэ калык кадь, нош кыӵе узыр дӥськутэз. Ми учким, кыӵе басмаослэсь вуро вылэм, кызьы со басмаез вандо вылэм. Ваньзэ сое эскерыса, милям вуриськись методистъёсмы басмаез вандонъя мастер-класс лэсьтӥзы. Асьсэлы кельшымонзэ, тупамонзэ бырйыса ужаны кутскизы».