Гербер улосвылкуспо шулдыръяськон 2019-тӥ арын Эгра ёросын ортчоз
«Тужгес бадӟымез праздникмы, туэ со нырысьсэ улосвылкуспо инлык басьтӥз, — со яратоно Гербермы. Ми озьы ик трос куноосты возьмаськомы — Росси Федерацилэн улосвылъёсысьтыз но, Росси Федерацилэн палэнысьтыз но: финн-угор калыкъёсты Финляндиысь, Эстониысь, Венгриысь. Туж оскиськомы, ми доры ваньмыз лыктозы шуыса», — вераз Татьяна Фёдорова.
Озьы ик со пусйиз, Удмуртиын ортчытъяськись вань йӧскалык элькун праздникъёсъя радъясь комитетъёслэн нырысетӥ кенешонъёссы ортчизы ни шуыса. Уж мынэ, шулдыръяськонъёслэн учкетсы (концепцизы) кылдытӥське.
Татьяна Фёдорова верамъя, 8-тӥ инвожое Сарапул ёросын поръёслэн Семык праздниксы ортчоз, со нуналэ ик Юкаменск ёросын — бесерманъёслэн Кӧрбан шулдыръяськонзы. 15-тӥ инвожое Можгаын элькун Сабантуй радъяськоз.
22-тӥ инвожое Красногорск ёросысь Бараны гуртын старообрядческой культурая «Петровское заговенье» V элькун фестиваль ортчоз. Озьы ик инвожое пӧртэм улосвылъёсысь фольклор коллективъёс Сарапул ёросэ ӟуч калык лулчеберетъя «Высокий берег» росси фестивале люкаськозы.
Тодэ вайытом, кылем арын элькун Гербер Ува ёросысь Пекшур гурт вӧзын ортчиз. Шулдыръяськонэ 10 сюрс пала люкаськиз.