«Иднакар» музейысь виртуальной нылашлы-экскурсоводлы ним бырйизы Удмуртиын
Виртуальной экскурсиез нуись XII даурысь нылашлы ним быръёнын тужгес трос куараос Уӵы ним люказ.
«Пусйымон пӧрмиз: Уӵы нылаш Учкакарысь. <…> тодосчиос уг тодо, кыӵе вал Учкакар но Иднакар вакытысь нимъёс. Но экскурсоводлэн нимыз удмуртъёслэн адямиосты будосъёсын, тылобурдоосын, пӧйшуръёсын, ужан вакытъёсын но инкуазен герӟаны языческой сямзылы тупа», — ивортэ Глазкар администрацилэн пресс-службаез.
Тодэ вайытом, нылашлы ним быръён 2018-тӥ арын куартолэзьысен 2019-тӥ арын 31-тӥ толшорозь кыстӥськиз. Карын улӥсьёс Тылси, Чингыли но Уӵы нимъёс понна куаразэс сётыны быгатӥзы.
Ватсалом, 2017-тӥ арын «Гид из прошлого» ӵектос Владимир Потанинлэн фондэзлэн грантъёсъя вожвылъяськоназ вормиз. Нырысетӥ виртуальной экскурсиос туэ толшоре усьтӥськизы но ялан ужась луозы. Ужрадэз Уӵы нылаш нуоз. Солэн вылтусыз XII даурын Учкакарын зэмос улӥсь нылкышноя кылдытэмын.