Удмурт кылын ужась нылпи театръёс пӧлын «Артэ» фестивале куриськонъёсты кутон кутскиз Удмуртиын
Фестивале вань мылкыд карись нылпи театръёс пыриськыны быгато. Тужгес бадӟымезлы пинал артистлы 17 арес луыны кулэ. «Артэ» вожвылъяськонын коллектив удмурт кылын театр миниатюра (3-10 минут), спектакль яке литературая крезьгуро композиция (25 минутозь) возьматыны быгатэ. Темаез эркын.
«Артэ» фестивальлэн валтӥсь ужпумез – йӧскалык лулчеберетэз утён но вӧлмытон, солэсь дунлыксэ будэтон но пиналъёслэсь творчествоя луонлыкъёссэс шараян, йӧскалык нылпи театр коллективъёслэн кивалтӥсьёссылэсь но режиссёръёссылэсь ӧнер устолыксэс будэтон
Тужгес устоез театр возьматон фестиваль-конкурслэсь гран-призэ басьтоз. Озьы ик лауреатъёсты но дипломантъёсты пусъёзы.
«Артэ» фестивале куриськонъёсты saravanowa.89@yandex.ru электрон адресъя 1-тӥ оштолэзёзь куто.
ВАТСАН
Удмурт репертуарен нылпи театръёс пӧлын «Артэ» фестиваль Брангуртысь «Кузьыликар» нылпи театрлэн кивалтӥсез но режиссёрез Ольга Туктарева кичӧлтэмен радъяське. Ньыль ар ӵоже со Брангуртысь лулчеберетъя юртын ортчылӥз.