Элькунамы покчиослы гожъяськисьёслэн клубзы ужзэ мытӥз

Клубе пырисько Удмуртиысь нылпи писательёс, гожъяськисьёс, нылпиослы сӥзем газет-журналъёсын ужасьёс.

Клубез кылдытонлы кичӧлтон сётӥз Удмуртиысь бигер нылкышноослэн «Ак калфак» огазеяськонзы (кивалтӥсез — Алия Абдуллина).

Нырысетӥ пумиськоназы ёзчиос мынӥсь арлы ужан радлыксэс пусйизы — со нылпи писательёсын пумиськонъёс, соосын тодматскон ужрадъёс, нылпи гожъяськисьёсын юн герӟет возьыны луонлыкъёс.

Озьы ик клублэн активез кылдытэмын. Отчы пыризы:

1) Гузель Максимова, нылпи писательёслэн йӧскалык клубенызы кивалтӥсь, кылбурчи, журналист;
2) Наталья  Сурнина, Удмуртиысь писательёслэн огазеяськонысьтызын ӟуч ёзэтэныз кивалтӥсь;
3) Голфия Исхакова, Татарстанысь но Удмуртиысь писательёслэн Союззылэн ёзчиез, Россиысь журналистъёслэн огазеяськонзылэн ёзчиез (Воткинск);
4) Оксана Соснина, гожъяськись, Можгаысь нылпи литературая «Инвистёнок» клублэн кивалтӥсез;
5) Илья Марков, нылпи кылбурчи, англи кылысь произведениосты берыктӥсь;
6) Фарида Закирова, крезьгурчи, мерлыко ужась;
7) Галина Ерёмина, Удмуртиысь писательёслэн Союззылэн ёзчиез, кылбурчи.

Клублэн ужпумаз пыре нылпиос пӧлын покчиослы сӥзем литератураез вӧлмытон уж но.

«Нылпиос понна гожъясьёс палэнэ кылемын, соослы нокытын возьматыны асьсэлэсь ужъёссэс. Собере пиналъёс но берло дыре книга лыдӟонэн уг тунсыкъясько, ваньмыз гаджетъёсы, айфонъёсы  выемын, нош лыдӟиськон палэнэ но палэнэ кыле. Таиз та одӥгез сыӵе ужпум — пиналъёсты лыдӟиськон борды кыскыны, берыктыны», — шуэ «Кизили» журналлэн валтӥсь редакторез Юргис Алексеев.

Пумиськонлэн йылпумъянъёсызъя огкылэ вуизы нылпи кылбуръёсты лыдӟонъя но суредъёсъя вожвылъяськон ортчытыны. Тужгес но усто ужъёсты огазеям бичетэ люкаса поттозы. Солэн авторъёсыз Удмуртиын улӥсь нылпиос луозы.