Тылси, Чингыли яке Уӵы: XII даурысь нылашлы ним быръёзы Удмуртиын

Экскурсоводлы ним быръён кык люкетэн ортчиз. Нырысь ик нимъёсты калык ӵектӥз.

«Валамон, тросэз дэмлазы Удмуртиын ӵемысь пумиськылӥсь нимъёс, кылсярысь, Италмас. Сыӵе вариантъёсты ми соку ик палэнтӥм, малы ке шуоно кыӵе ке коллективъёслэсь нимъёссэс басьтэммы уг поты вал. Кылем нимъёс пӧлысь бырйим тужгес яркытъёссэ но тупасьёссэ 3 нимъёсты: Тылси, Чингыли, Уӵы. Та нимъёс пӧлын ни куара сётон ортчытӥм», — вераз «Иднакар» музейысь археологияя ёзэтлэн кивалтӥсез Александр Дёмин.

Виртуальной экскурсиез усьтон но нылашлэсь нимзэ шараян нуналэ Глазкарысь ЗАГС XII даурысь экскурсоводлы быръем нимъя сертификат сётоз.

Пусъём, виртуальной экскурсия «Гид из прошлого» ӵектос улсын Владимир Потанинлэн фондысьтыз грант чотын одӥг но ӝыны ар куспын кылдытэмын. Отын музейысь экспонатъёс 3D амалэн интыямын. Экскурсия музейын ялан ужалоз но валтӥсь адӟытонлы ватсэт луоз.

https://udmurt.media/udm/news/kultura-i-turizm/49741/