Эграын нош ик «Пельняньысен Китаёзь» фестиваль ортчоз

16-тӥ тулыспалэ Эгра каргурт Ижкарын ортчись «Пельняньлэн дунневыл нуналэз» фестивалез азьланьтоз. Программае мастер-классъёс, суредъёсъя «Пельнянь историос» адӟытон, «Пельнянез утчан» квест но мукет ӵошатсконъёс пыртэмын.

Куинетӥзэ ини ортчытыны чакламын быгатонлыкъёсъя «Йӧскалык марӟан» вожвылъяськон. Отын возьматозы выжы калыкъёслэсь пельняньлы тупась сиёнъёссэс. Пыриськозы Эгра но мукет ёросъёсысь йӧскалык лулчеберетъя огазеяськонъёс.

Вожвылъяськон чакламын покчиос понна но. Озьы «Пельнянь дефилее» пыриськозы ёросысь нылпи садэ но школае ветлӥсьёс. Со сяна фестивальын такмакъёсты быдэстонъя ёроскуспо конкурс ортчоз. Арлы быдэ отчы яратыса пырисько коня ке ёросъёсысь кырӟасьёс.

Тодады вайытом, Эгра ёрос 5 ар талэсь азьло «Пельняньысен Китаёзь» элькун фестивальлы кутскон сётӥсь луиз. Со проектэн ёрос россикуспо «Маршрут года» турпремилэн призёръёсыз пӧлы пыриз.

Сиён-юонлы сӥзем шулдыръяськон Эгра каргуртын пӧртэм площадкаосын мыноз – этнопаркын, валтӥсь площадьын, шаертодонъя музейын но мукет интыосын. Пыр-почгес тодыны луоз  фестивальлэн ВКонтакте вотэсбамысьтыз.