Дэбес ёросын «Лымы Пог» фестиваль ортчиз

«Туж шумпотыса ми калыкез пумитамы: творческой коллективъёсты но, скульпторъёсты но Балезино, Эгра, Шаркан, Вотка, Кез ёросъёсысь. Туэ туж трос художественной самодеятельностез быгатӥзы возьматыны. Скульпторъёс 11 команда вал милям туэ», — шуэ Тыловайысь клублэн кивалтӥсез Нина Перевозчикова.

Фестивалез улосчизылэн Геннадий Корепанов-Камскийлэн «Лымы тӧдьы» кырӟанэныз кутскиз. Тодмо удмурт крезьгурчилэн вордскем дырысеныз туэ 90 ар тырме, ужрадэз радъясьёс сое одно ик пусъёно кариськизы.

Нина Перевозчиковалэн верамезъя, скульпторъёс 2 метр ӝуждалаем но одӥг метр пасьталаем лымы блокъёслэсь пӧртэм кабъёс лэсьтытозь, ульчаысь сцена вылын творчествоя коллективъёс маскара пӧртмаськон йылолъёсты возьматӥзы, нош нылпиос гурезьысь нискылазы, вожвылъяськизы. Артэ ик «Пань-пань – котэм нянь» площадка ужаз. Омырын шулдыръяськон сямен кылдэм кӧт сюманзэс куноос перепечен, табанен, пельнянен, ӝукен, «тыловай сямен чипсыен» — пичи гурт вылын пыжем картофкаен, пӧсь чаен буйгатӥзы.

Скульпторъёс туж мыло-кыдо кабъёс лэсьтӥзы – перепеч, арганэн шудӥсь парсьпи, уробоен мотоблок, арслан, эмъясь но мукет.

2020-тӥ фестиваль нырысетӥ котырес лыдпуссэ — 5 арзэ пусъёз. Нина Перевозчикова 20 творчествоя коллективъёсты но 20 скульпторъёсы ӧтьыны быгатозы шуыса оске.

https://udmurt.media/udm/news/kultura-i-turizm/49289/