Герд лыдӟонъёс Ижкарын 21-тӥ тулыспалэ ортчозы

Конференцилэсь темазэ ӧз пусъе на, но валтӥсь ивортонъёсты пиналъёс но егитъёс лэсьтозы шуыса вераськизы.

«Азьвыл докладъёс лыдӟо вал тодмо тодосчиос, таяз радэ луозы дышетскисьёс но студентъёс. Докладъёс сӥземын луозы Гердлы, солэн мытэм ужъёсызлы но озьы ик герӟаськемын луозы дышетскон интыосын (Можга педколледж яке Мултан, кылсярысь), соослэн интызы удмурт калыклэн историяз», — вера Елена Рябина, Герд лыдӟонъёсты радъясь комитетлэн ёзчиез.

Конференцие быдэс Удмуртиысь 200 адями вуоз шуыса чаклало. Озьы ик ӧтёнъёс палэнысь удмуртъёслы но лэзёзы.

«Туэ ӧтёзы Ижысь тросгес дышетскисьёсты (нырысь ик удмуртъёссэ, угось лыдӟонъёс удмурт кылын ортчозы): школаосысь но, шоръёзо ӧнер дышетсконниосысь но, УдГУ-ысь но», — шуэ Елена Рябина, Герд лыдӟонъёсты радъясь комитетлэн ёзчиез.

Тодэ вайытом, кылем арын Герд лыдӟонъёс Вавож ёросын радъязы. Туэ конференциез ортчытыны интыез быръёнлэсь мугзэ азьвылгес валэктӥз «Удмурт Кенеш» огазеяськонлэн тӧроез Татьяна Ишматова.

«Кемалась ини отчы ӧм поталэ. Пиналъёсты но адӟем потэ, кызьыгес азьланьтӥське уж гимназиын. Но со дыре ик, тодӥськоды, асьмеос быдэс арзэ ёросъёстӥ ветлӥм, Ижкарын кема ӧй вал ни ужрадъёсмы, соин ик люкаськом шоркарамы шуыса малпамы таяз аре», — шуэ Татьяна Ишматова, «Удмурт Кенеш» огазеяськонлэн тӧроез

Конференциын ик Кузебай Герд нимо йӧскалык премиосты сётозы.

Тодэ вайытом, нырысетӥосыз Герд лыдӟонъёс Удмуртиын 1988-тӥ арын ортчизы. 2017-тӥ арын конференциез Пичи Пурга черкогуртын радъязы. Со нимаськиз «Кузебай Гердлэн дуннеосыз: Гурт — Кар — Кыл — Революция». Кылем арын Вавожын «Кузебай Герд улэ асьмемын ӵош» темая ивортонъёс лэсьтӥзы.

https://udmurt.media/udm/news/obshchestvo/48957/