Каракулино ёросын Шорыкйол пор шулдыръяськон ортчытӥзы

Шорыкйол («Ыжпыд») 22-тӥ толсурысен пусйиськыны кутске. Инмарлы оскись поръёс сое христиан Ымусьтонэн огвакытэ пусъё. Соку семья но юртъер котырын ванё-буро улон курыса, сӥзьыса пӧртэм сям-йылолъёс ортчо.

Йӧскалык лулчеберетъя «Удмуртиысь поръёс» огазеяськонлэн Кенешезлэн Тӧроез Анатолий Радыгин но Каракулино ёросысь пор огазеяськонлэн кивалтӥсез Вернер Ушков вань люкаськемъёсты Выль арен но Шорыкйолэн ӟечкылазы. Сцена вылын концерт возьматӥзы фольклоръя пор коллективъёс.

Озьы ик ортчиз «Мынам семьяе» вожвылъяськон. Конкурслэн заданиосыз  пор калык лулчеберетлы, сям-йылолъёслы сӥземын вал. Отчы пыриськизы Каракулино ёросысь семьяос: Ныргындаысь Саликовъёс, Быргындаысь Япаровъёс, Галановоысь  Кубакаевъёс, Усть-Саклаысь Смирновъёс.

Ваньзэсты соосты дипломъёсын но кузьымъёсын пусйизы.