Комиысь кунокуаын удмурт тусо висъет кылдӥз
Удмурт номер сяна, кунокуаын мукет финн-угор но самоди калыкъёслэн аспӧртэмлыкенызы висъетъёс вань. Соос пӧлын мадьяр, коми-зырян, ижор, финн но мукет, ваньмыз 24 пӧртэм номеръёс. Котькудаз йӧскалык пужыен басмаос, чеберлыко киужъёс но вашкала арбериос вань.
«Удмуртъёслэн яркыт антропологи аспӧртэмлыксы – кельыт буёло йырси, соин ик номер кельыто-напӵуж луоз. Карелия – сюрс тыослэн шаерзы, соин ик кезьыт чагыр буёл быръемын. Ливъёс – дӥсьтӥсь мореходъёс но чорыгасьёс, гостиницалэн сак куноез адӟоз та аспӧртэмлыкез шифон штораосысь», — вера Елена Иванова, Ыб черкогуртысь финн-угор этнопарклэн кивалтӥсез.
Кызьы пусйиз Комиысь лулчеберетъя, туризмъя но архив ужъя министр Сергей Емельянов, куноослы Выль арлы таӵе кузьым Ыбысь этнопарклэн кичӧлтэмезъя лэсьтӥзы. Гостиницаез ужъюртлэн коньдонэныз выльдӥзы.
Номеръёсысь куд-ог арбериосты этнопаркын ужасьёс экспедициос дыръя шедьтылӥзы, мукетъёссэ ужъюртлэн эшъёсыз кузьмазы.
Кунокуаез выльдон но ӵыжы-выжы луись Росси улосвылъёс но кунъёс сярысь тодонлыкез вӧлмытон финн-угор туризмез азинтон программалэн бадӟым люкетэз. Елена Ивановалэн верамезъя, вуоно арын соос улосвылкуспо финн-угор туръёслы кутскон сётыны малпало.