«Удмурт нылпилы — удмурт выжыкыл!» видеоконкурсъя куара сётон мынэ

Куара сётыны луэ огазеяськонлэн «ВКонтакте» мерлыко вотэсысь нимлыко бамаз. Вормисез пусъёзы южтолэзь пумын «Табань-клублэн» вуоно пумиськоназ.

Со сярысь иворъёсъя «Удмуртия» агентстволы вераз «Удмурт нылкышно кенеш» огазеяськонлэн кивалтӥсез Надежда Степанова.
 
«Котькудӥз пичи фильм кадь лэсьтыны тыршиллям, котькудӥз кыӵе ке но тани удмурт корка, удмурт шудонъёс, удмурт котыр кылдытэм. Со но шумпотымон. Тазьы, удмурт пиналъёслы удмурт кылын лыдӟонъёсты ми азьланьтом озьы ик группаямы», — шуиз Надежда Степанова.

Конкурсэ пыриськыны сизьым мурт мылкыд кариз. Соос пиналъёссылы но нунокъёссылы «Лудкеч но эбек», «Шунды анай, пот, пот!», «Курка, ӵӧж но мукетъёсыз», «Кескич шырпи», «Ӟольгыри но шыр», «Сяртчы», «Ӟичы но душес» выжыкылъёсты лыдӟизы.
 
Вераны кулэ, ужъёс эшшо но тросгес луысалзы, малы ке шуоно беромыса келясьёс вал. Кылсярысь, Сюмсиысь одӥг фильме огазеям куинь уж вуиз. Но, жаляса верано, соос конкурсэ ӧз ни сюре. Но ужъёсты озьы ик учкыны луэ «Удмурт нылкышно кенеш» огазеяськонлэн «ВКонтакте» мерлыко вотэсысь нимлыко бамысьтыз.
 
Та минутлы тужгес но трос пол учкизы Пичи Пурга ёросысь Эгра гуртысь Лилия Семёновалэсь «Курка, ӵӧж но мукетъёсыз» выжыкылэз лыдӟемзэ — 1568 мурт. Со понна ик тужгес трос куара сётӥсьёс но — 541. Нош вань ужъёс понна огъя 1482 куара сётэмын ини.

Пусйыны кулэ, выжыкылъёсты нылкышноос сяна, пиосмурт но лыдӟиз. Со Можга ёросысь Мельниково гуртысь Альберт Белоусов. Солэсь выжыкылзэ 737 мурт кылзӥз ини.
 
Конкурс пиналлы выжыкыл веран сямез улӟытон понна радъяське. Тодэ вайытом, кылем арын «Анай выжыкыл» нимо видеоконкурс радъяськиз вал ини. Отчы ог дасо пала адями пыриськиз.