Туннэ анай кыллэн нуналыз

Ужрад вал Удмурт Тоймобаш школаын. Отчы люкаськизы быдэс ёросысь удмурт кылэз дышетӥсь пиналъёс. Нылпиос пӧртэм станциосъя ужазы. Вера Алнаш ёросысь дышетонъя управлениысь ӧнерчи Валентина Векшина:
 
«Уж радъяськиз станциосъя шудон амалэн. Пиналъёс асьсэлэсь тодон-валанъёссэс но быгатонлыкъёссэс эскеризы «Утись пус», «Визь ӝук», «Удмурт эктон», «Пичи модельеръёс» станциосын. Лыктэм пиналъёс горд, сьӧд но тӧдьы буёло сӥньысъёсын утись пус лэсьтыны дышетскизы, диктант гожтӥзы, удмурт гуръёсъя шулдыръяськизы, удмурт пужыосын дӥсь лэсьтӥзы-вуризы».
 
Станциосын шудэмзы бере асьсэос ик пиналъёс концерт возьматӥзы. Арганэн удмурт гуръёсты быдэстӥзы Азамат, Выль Утчан школаосысь пиос, гитараосын шудыса кырӟазы Байтерек гуртысь нылъёс.
 
Нош концерт бере конференцилэн мынэмез сярысь видефильм возьматӥзы на. Вань ужез дасяз но бергатӥз Удмурт Тоймобаш школаысь удмурт кылъя дышетӥсь Татьяна Пчельникова.