Удмурт кылын радиоверанъёс чузъяськозы Казаньын

Нырысетӥез передача ог кык арня ортчыса потыны быгатоз ни.
 
Со интернет радиовещание — UFM радио, студентъёслэн радиозы, — вера «Татарстан Элькунысь удмуртъёслэн йӧскалык лулчеберетъя автономизы» улосвыл мер огазеяськонлэн быдэсъясь кивалтӥсез Марина Иванова. — Интернетын эфирез луоз солэн, меӵак эфирын гинэ ужало, но подкастъёс но луозы. Ми ужаломы меӵак эфирын, нырысетӥ передачаос кык арнялы одӥг пол луозы, дыр. Собере ини, куке штат люкаломы… но со добровольной радио, студентъёслэн, соин ик, куке пиналъёслэн тунсыксы кылдоз, кинлэн мылкыдыз ӝутскоз, соосты ми дасяломы но эфире поттомы
 
Радиоверанъёс студентъёслэн, егитъёслэн улон-вылонзы сярысь луозы, «егитъёслэн радиозы — егитъёс понна».
 
«Нырысетӥ передачаын Казань сярысь вераломы, кытчы дышетскыны пырыны луэ, кыӵе интыосы ветлыны — тани вокзалысь потӥд но, мар карыны, кытчы мыныны, мар учкыны. Туризмъя маршрут выллем мар ке но яке абитуриентъёслы, шуом, кинлэн татчы лыктыны мылкыдыз вань», — валэктӥз Татарстанысь удмуртъёслэн автономизылэн быдэсъясь кивалтӥсез.
 
Марина Ивановалэн верамезъя, радиоверанъёсты нуыны ачиз кутскоз. Кыкетӥез кандидат — Ижкарысь Кузебай Герд нимо гимназиез йылпумъясь, али Казаньысь лулчеберетъя но искусствоосъя кун университетын кыкетӥ курсын дышетскись Анна Самсонова.
 
Кызьы вераз удмуртъёслэн автономизылэн быдэсъясь кивалтӥсез, йӧскалык радиовещание со Татарстанын улӥсь калыкъёслэн егитъёссылэн ассамблеязылэн но UFM радиолэн ӵектоссы. Со борды нырысь ик кутскизы кунгож сьӧрысь лыктэм студентъёс. Удмуртъёс нырысетӥосыз, кин Поволжьеысь калыкъёслэсь передачаос нуоз. Марина Иванова со сярысь ватсаса ивортон одно ик луоз шуыса оскытӥз.