Устозэ выль кенэз быръёзы Дэри ёросын

Вожвылъяськонэ 18-35 аресъем бызем нылкышноос пыриськыны быгато. Выль кенъёслы валтӥсь курон – удмурт кылын вераськыны быгатон.

Таяз арын нылкышноос вить эскерон пыр ортчыны кулэ. Соос пӧлын туспуктэмъёс но видео пыр асэнызы но семьяенызы тодматон, творчествоя номер, удмурт кырӟанэз тодман, киужъёссэс адӟытон но куно пумитаны быгатонлыкъёссэс возьматон.

«Куно пумитан – татын йӧскалык сиён-юонэн потоно луоз соослы: перепечен-а, кыстыбеен-а, кин, мар пӧраны быгатэ. Возьматыны кулэ, кыӵе соос сабырлы кышноос», — шуэ Анжелина Филимонова, Дэри ёросысь егитъёслэн центрысьтызы ӧнерчи.

Конкурс нылкышноос пӧлын ортчытӥське ке но, пыриськисьёслы семьяоссы юрттыны быгато, соин ик вожвылъяськон егит семьяослы шуыса нимаське.

«Соос юрттэт быгатозы кутыны семьязылэсь. Эктозы но, кырӟалозы но, представление но, оло, ӵош карозы. Киужъёсын презентацие вань семьязэс но поттыны быгатозы сцена вылэ», — азьланьтэ Анжелина Филимонова.

Та дырлы кык выль кенъёс гинэ конкурсэ пыриськыны мылкыдзэс веразы. Дэри ёросысь тросэз муниципал кылдытэтъёс удмурт кылын вераськись егит нылкышноез шедьтыны капчи ӧвӧл шуыса ӝожтӥсько, вера Анжелина Филимонова. Озьы ке но, кылем арын «Выль кен» вожвылъяськонэ сизьым нылкышноос пыриськизы, соин ик радъясьёс оско, куриськонъёс вуозы на шуыса.

Ватсалом, Дэри ёросын улӥсь выль кенъёслэсь конкурсэ пыриськыны мылкыд каремзы сярысь куриськонъёссэс 22-тӥ коньывуонозь куто.

https://udmurt.media/udm/news/kultura-i-turizm/43583/