Финн-угор калыкъёслэсь нуналзэс пусйыны визьбур шудонэ ӧтё Удмуртиын
Ужрад «Этноэксперт» яке «Что? Где? Когда?» шудонъёс выллем ортчоз, но вань юанъёс финн-угор темая кӧня ке блокъёслы люкемын луозы.
«Нырысетӥ блок луоз «Матрица». Отын сыӵе табличка, кытын темаосъя юанъёс, котькуд юан 20 баллы, 30, 50 баллы. Кудӥзлы юанлы вераськод, сомында балл басьтӥськод. Шонертэм валэктон сётӥськод ке, минус витьтон, кылсярысь. Тӥни озьы баллъёс басьтӥськод нырысетӥ люкетаз», — вера Алина Чернова, Удмуртиысь Калыкъёслэн эшъяськон юртысьтызы методист.
Эшшо луоз «60 секунд» блок, кытын 10 юанлы быдэн минут висъяськоз. Со сяна, радъясьёс крезьгурен, эктонъёсын, суредъёсын герӟаськем юанъёсты дасялозы.
Куать адямилэсь команда люкаса, куриськонъёсты 15-тӥ коньывуонозь omfus@mail.ru электрон почтае келяно. Алина Черновалэн верамезъя, туннэ нуналлы удмуртъёслэсь куриськонъёс вуизы ни. Нош оглом даслэсь трос команда люкаськоз шуыса малпало.
«Ми асьмелы пуктӥм, 12 (команда – ред.) мед луоз шуыса. Возьмаськом командаосты. Спонсоръёсты кыскиськом, тунсыко луозы кузьымъёс», — шуэ Алина Чернова.
Ватсалом, Ӵыжы-выжы финн-угор калыкъёслэсь нуналъёссэс таӵе амалэн пусъён Удмуртиын нырысьсэ радъяське.