Ижысь Калыкъёслэн Эшъяськон юрт юбилейзэ пусйиз

Шаерысь 36 выжы-калыкъёс — одӥг липет улын. Соосты туннэ огазея Ижкарысь Эшъяськон юрт. Со йӧскалык политикая элькун министерство бурд улын кылдытэмын юри пӧртэм выжы калыкъёсты огазеян, эшлыко кусыпъёс юнматон понна. Бадӟым ужлы кутскон сётэмын вал 10 ар талэсь азьло.

«Соку быдэс Россиын таӵе юрт нырысетӥез луиз, — шуэ йӧскалык политикая элькун министр Лариса Буранова. – Собере туж трос улосвылъёс та моделез басьтӥзы. Милесьтым адӟыса кылдытӥзы пӧртэм йӧскалык центръёс, Эшъеськон юртъёс. Ми со понна туж шумпотӥськом».

Туннэ вераны луоз — татын вордӥсько но улонэ пыӵало бадӟымесь проектъёс. Соос шаерамы гинэ уг вӧлмо, татын кылдэм форматъёсъсъя ужало мукет улосвылъёсын. Проектъёстъя ужан ӧрез Эшъяськон юртын 3-тӥ арзэ нуо.

«Вань вормонъёс, вань мар бордын ужаны — шуэ юртлэн кивалтӥсез Татьяна Боталова. — Али ми ужан ӧрмес воштӥськом. 2017-тӥ арын ми 555 ужрадъёс ортчытӥм. Туэ ӝыны ар ӵоже 300-лэсь трос ини. Соос будо. Соин ик ми малпам ужрадъёс вылысь проектъёс вылэ рос-прос выжыны. Шуом, кыӵе ке ужпумез сэрттон-пертчон понна ми юрттыны быгатӥсь ведомствоен, министерствоен ӵош проект кылдытӥськом. Ӵектос, нош со ужрадъёс, кылдэм югдурез умоятон понна улонэ пыӵаны кулэ».

Кызьы пусйиз Татьяна Боталова, Эшъяськон юртлэн азинлыкез элькунысь йӧскалык лулчеберетъя огазеяськонъёслэн пайдаё ужзы, пӧртэм струкрураосын, тӧрлыкен юнматэм кусыпъёс но юртысь ӧнерчиос бордын.