40 воршудъёс вуизы Вань удмурт воршудъёслэн ыстэм муртъёссылэн люкаськоназы Глаз ёросэ
«Паймымон – воршудъёсмы туж трос вал. 40 туннэ лыдъямы, 40 воршуд нимъёс. Ваньмыз ужрадамы пыриськиз кык но ӝыны сюрс адями. Палэнысь но вал – вал Бигерысь, вал Киров улосвылысь», — вера Ольга Боталова, Глаз ёросысь Лулчеберетъя но туризмъя центрысь ӧнерчи.
Солэн кылъёсызъя, котькуд делегация аслаз воршуд нимыныз тодматӥз: кин ке кырӟаз но эктӥз, кин ке воршудэн герӟаськем йылолэз возьматӥз.
«Вал визитной карточкаос: кин ке творчествоя номер дасяз. Кылсярысь, Яр ёросъёс возьматӥзы воршуд коробъёс. Воршудной коробъёс али воксё улонын ӧвӧл, кытын ке музейёсын гинэ. Нош соос милемлы возьматӥзы сцена вылын, мар со сыӵе воршуд короб, — шуэ Ольга Боталова.
«Визитка» бере пӧртэм мастер-классъёсын площадкаос ужаны кутскизы. Соосты асьсэос делегациос ик дасязы. Кин ке шудон ваиз, кин ке хороводъёс, кин ке концерт программа. Со дыре ик фольклоръя кык площадка ужаз: «Мудор крезь» но «Доре мынам», кудаз воршудъёс сярысь, семьяоссы сярысь вераськизы.
Со сяна, котькуд воршудлэн аслаз азбарез радъямын вал. Отын адӟытон-вузкарон, мастер-классъёс но учкисьёсын шудонъёс ортчизы.
Ужрадын озьы ик Тӧро кенеш ортчиз. Отчы 14 воршудъёслэн тӧрооссы люкаськизы но резолюция кутӥзы.
Радъясьёс чакламъя, удмурт воршудъёслэн ыстэм муртъёссылэн люкаськоназы сомында адями вуиз бере, со калыклы кулэ. Малпамъя но вазиськонъёсъя, уж пӧрмиз, шуэ Ольга Боталова.