Пӧртэм йӧслыкысь нылкышноосты «2018-тӥ арлэн песянаез» вожвылъяськонэ пыриськыны ӧтё Ижкарын
Удмуртилэн шоркараз улӥсь поръёслэн «Ижевск Мари» огазеяськонзы та вожвылъяськонэз калыкъёслэн йылолъёсынызы тунсыкъяськонэз будэтон, пӧртэм калыкъёслэсь кусыпъёссэс юнматон, нылкышнолэсь чеберлыксэс возьматон, туала дэменлыкын песянайлэсь интызэ ӝутон вылысь радъя.
Вожвылъяськонэ песянайёсты Ижкарысь, озьы ик элькунысь йӧскалык огазеяськонъёс ӵектозы шуыса чакламын. Котькуд выжы калыклэсь быдэн одӥг песянай пыриськыны быгатэ.
Валтӥсь куронъёс: ас калыкедлэсь йылолъёссэ но историзэ тодон, сцена вылын астэ возьыны, синмаськытыны быгатон, аспӧртэм возьматон дасян.
Со сяна, котькудӥз йӧскалык огазеяськон яке творчествоя коллектив пыриськисьёслы дурбасьтӥсьёслэсь группазэс дасяны кулэ.
«2018-тӥ арлэн песянаез» кар йӧскалык вожвылъяськонлэн йылпумъян люкетэз 9-тӥ толсуре 13 часын Ӟуч лулчеберетъя «Русский дом» центрын ортчоз.
Пыриськисьёс асэнызы, озьы ик ас калыксылэн песянайёсын герӟаськем йылолъёсыныз тодматӥсь стендъёс дасяны, йӧскалык сиёнэн тодматыны кулэ.
Сцена вылын творчествоя быгатонлыксэс, йӧскалык дӥськутсэс возьматозы, юанъёслы валэктонъёс сётозы. Озьы ик нимаз номер дасяны кулэ дурбасьтӥсьёссы но.
Вожвылъяськонлы дасяськон вакытэ радъясьёс пыриськисьёслы котыр ласянь юрттэт сётыны оскыто.
Конкурсэ пыриськем вань песянайёсты пӧртэм номинациосъя пусъёзы. Со сяна, вожвылъяськонлэн огиназ радъям куара сётонын вормисьлы нимаз кузьым чакламын.
Куриськонъёсты yamakov@inbox.ru электрон адресъя келяно.
Ватсалом, радъясьёс «2018-тӥ арлэн песянаез» йӧскалык вожвылъяськонэз ортчытыны коньдон утӥзы мерлыко ӵектосъёсъя но программаосъя кар конкурсын вормыса.
Тодэ вайытом, кылем арын конкурсын вормыса, «Ижевск Мари» огазеяськон чеберлыкъя «ИжКРАСА-2017» йӧскалык вожвылъяськон ортчытӥз. Йылпумъян люкетаз 12 нылъёс Удмуртиын улӥсь 11 йӧслыкъёслэсь лулчеберетсэс но аспӧртэмлыксэс возьматӥзы.