Росси флаглэн нуналыз улсын шаерамы Куншетлэн эстафетаез ортче

Удмуртиын нырысьсэ таӵе акци радъямын. Эгра урам кузя Росси куншетэз каргуртын улӥсьёс нуизы. Соос пӧлын пӧртэм удысъёсын тыршисьёс, пӧртэм выжы калыкъёс, нылпиос, арлыдоос.

Эграос доры Росси куншетэз вуттӥзы дэбесъёс. Татын шествие асьсэ ёросэнызы данъяськон шӧм пыртӥзы.

«Милям Эгра ёросмы туж юн данъяське спортсменъёсын-велосипедистъёсын, — шуэ Эгра ёрос администрацилэн тӧроезлэн воштӥсез Александр Шамшурин. — Туннэ но милям Куншетлэн азьпалаз велосипедистъёс мынӥзы».

Флаглэн котькуд буёлэзлэн аслаз пуштросэз. Тӧдьы буёлэз возьматэ йӧнлыкез но эрикез, лызэз — оскиськонэз но осконэз, гордэз — дӥсьтонэз но кунлыкез. Россиен, ёросэнызы данъяськон мылкыдзы сярысь веразы уноез флагез нуисьёс.

Эграос куинь буёло Россилэсь пуссэ артысь ёрослы — Сьӧлтаослы сётозы. Озьы флаг Элькунмес котыртыса, 22-тӥ гудырикошконэ Ижкаре вуоз.