Удмурт кылын экскурсиос ортчыттъялозы Суредан устолыкъя элькун музейын

Сыӵе кичӧлтонэн потӥз музейысь экскурсионно-массовой ёзэтлэн кивалтӥсез Ольга Бикузина.

Солэн верамезъя, удмурт кыл пӧртэм удысъёсын ӵемгес чузъяськыны кулэ. Соин ик асьме калыкез искусствоен анай кылынызы тодматыны мылкыд кылдӥз.

«Пӧртэм гуртъёсысь мылкыд карисьёсты возьмаськом, кинлэн искусство сярысь удмурт кылын кылзэмез потэ, — шуэ Ольга Бикузина. — Туж возьмаськом, малы ке шуоно, удмурт кылын мынӥсь экскурсиосты ми дорын сяна нокытысь уд кылэ».

Ачиз Ольга Бикузина дышетскемезъя — кылчи, удмурт кылъя дышетӥсь. Озьы ик кык кылэз тодӥсь нылпиосын ужанъя «Нуныкай»центрлэн кураторез луэ.