«Элькуновидение» вожвылъяськонэ пыриськон понна куриськонъёсты кутыны кутскизы

Вожвыляськонлэн радлыкез пумысен воштӥськонъёс ӧвӧл, но чурыт куронъёс пуктэмын луозы таяз радэ ёросъёсысь жюрилэн ёзчиосызлы.

«Жюрилэн ёзчиосыз крезьгур удысэз одно тодыны кулэ, яке соос азьвыл «Элькуновидение» вожвылъяськонэ пыриськем адямиос мед луозы, малы ке шуоно кылем аръёсы вал сыӵе учыръёс, куке жюрие пуксьылӥзы  культураен герӟаськымтэ адямиос. Калыклэн трос юанъёсыз кылдылӥзы — кызьы соос куаразэс сётылӥзы», — шуиз «Элькуновидение» вожвылъяськонэз огез радъясь Сергей Касаткин.

Удмурт кырӟанъя вожвылъяськонэ пыриськыны мылкыд карисьёслэсь куриськонъёссэс 30-тӥ куарусёнозь kasik@myudm.ru электрон почтае келяно.

Тодэ вайытом, «Элькуновидение-2017» конкурслэн концерт люкетаз 19 кырӟан пыриськиз, финалэ 14-ез потӥз. Вожвылъяськонын вормиз Сарапул ёросысь Павел Смирнов «Чирдоз уӵы» кырӟанэныз. Удысужлыко жюри малпамъя, «Элькуновидение-2017» вожвылъяськонлы устозэ кылбурез гожтӥз Дэбес ёросысь Ольга Перевозчикова («Палэзьпу юмшан»), устозэ крезьгурез — Вотка карысь Любовь Иванова («Итаысь италмас»). Учкисьёслэн кузьымзы понна вожвылъяськонын вормиз Шаркан ёросысь Александра Протопопова.