Глазкарысь «Иднакар» музей Росси улосвылъёсысь этнографи туризмъя устоосыз практикаосын бичетэ пыриз

«Асьмелэн ужаммы, ужрадъёсмы сярысь верамы, соослы со тунсыко потӥз. Озьы ми со бадӟым чебер бичетын луомы. Сое, кызьы мон валай, быдэс Россие вӧлмытозы, вань туропрераторъёслы сётозы. Со Удмурт Элькунэз возьматыны одӥгез амал», — шуэ Ольга Арекеева, «Иднакар» музей-заповедниклэн кивалтӥсез.

Солэн кылъёсызъя, 2017-тӥ арын «Иднакар» музее 8 сюрслэсь трос адями вуылӥз. 2016-тӥ арен ӵошатыса, со 85 процентлы тросгес. Пичи карысь пичи музей понна со ӧжыт ӧвӧл, пусйиз Ольга Арекеева.

Таяз арын туристъёслэн лыдзы эшшо йылоз шуыса оско. Куартолэзе «Страж. 12 веков истории» фестивале гинэ 6 сюрс пала адями вуылӥз.

«Шутэтскон нуналъёсы экскурсоводъёсмылэн ымзы уг пытсаськылы шуыны луоз — одӥген но лыкто, семьяосын но. Пӧртэмлыкез шӧдӥське, Инмарлы тау, тунсыкъяськон кылдӥз», — вера Ольга Арекеева.

Солэн верамезъя, коньывуонэ музейын удмурт но ӟуч кылъёсын вераськись анимированной гид ужаны кутскоз, со но тунсыкъяськон мылкыдэз будэтыны кулэ.

Тодэ вайытом, таяз арын Глазкарысь «Иднакар» музейлэн «Гид из прошлого» ӵектосэз «Воштӥськись дуннеын воштӥськись музей» («Меняющийся музей в меняющемся мире») вожвылъяськонын вормиз.

https://udmurt.media/udm/news/kultura-i-turizm/40260/