Глазкарын Удмуртиысь калыкъёсын тодматӥсь адӟытон ужа

Та туспуктэмъёс Глаз ёросысь лулчеберетъя но туризмъя центрен кылем арын радъям фотоэкспедициос дыръя лэсьтэмын. Удмуртилэн уйпалаз удмуртъёслэсь, бесерманъёслэсь, бигеръёслэсь асӧпртэмлыксэс утчазы но фотое пуктылӥзы.

Быдэс элькунысь туспуктӥсьёс Ӝуамын, Бигер Парзиын, Слудкаын, Самойгуртын улӥсьёсын пумиськылӥзы, соослэсь лулчеберетсэс, йылолъёссэс чаклазы.

Экспедицилэн емышез луиз 300 гигабайтлэсь трос тодосъя ивортодэт, со чебер но капчи возьматэмын — суредъёсын. Устоосыз 60 туспуктэмъёс адӟытонлы быръемын. Соос огшоры адямиослэсь — асьме бускельёсмылэсь — выжы куаразэс возьмато.

«Котькуд туспуктэм аспӧртэм. Со шока. Со улэ. Тани-тани кенер вылын пукись коӵышлэсь куаразэ кылод кадь, черсэз бергатӥсь бесерман песянайлэсь серекьямзэ. Бигер балишлэсь ческыт зынзэ шӧдод», – иворто адӟытонэз радъясьёс.

Нялтас вераса, фотоадӟытон Ижкаре Калыкъёслэн эшъяськон юртазы, бигер лулчеберетъя «Мирас» фестивале, Москвае «Гербер» празднике вуылӥз ни.