Нылпиослы удмурт кылын пьесаосын но сценарийёсын выль книга потӥз Удмуртиын

«Татчы пыртэмын пьесаос но сценарийёс, кудъёсыз туж кулэ, шуом, яке нылпи садикъёсын, кытын бадӟымъёс нылпиослы мар ке дасяло, праздникъёс выллем. Шуысал на мон, школаысь драмкружокъёслы но, соослы туж киыз но пыдыз луысал», вера книгалэн редакторез Сергей Матвеев.

Солэн верамезъя, таӵе пуштросэн книгаос туж ӧжыт пото. Ӵемгес луо яке огшоры выжыкылъёс, яке пьесаос, кудъёссэ театрын пуктыны кулэ.

Дышетсконниослы сяна, Римма Николаевалэн выль книгаез анай-атайёслы но пайдаё луоз, лыдъя издательствоысь редактор. Отысь произведениосты пиналъёссылы лыдӟем сяна, соос быдэс семьяен сценка но пуктыны быгатозы.

Огъя удмурт нылпи литератураез дунъяса, Сергей Матвеев пусъе, пиналъёслы гожтэм книгаос «Удмуртия» издательстволэн вузкароннияз уг ӝегало шуыса, соосты бадӟымъёслы чаклам литературалэсь ӝоггес басьто. Озьы ик нылпи книгаос огъя удмуртлыкез но азинтыны юртто, ватса редактор.

«Асьмелэн огъя удмурт лулчеберетэз азинтон, ӝутон, удмуртлыкез огъя карон пичиысен кутскыны кулэ. И пиналъёслы удмурт кылын потэм книгаос, соос туж бадӟым инты басьто пиналъёсты кыллы дышетонын», — вера Сергей Матвеев.

Ватсалом, Удмуртиысь дано артисткалэн Римма Николаевалэн «Мадей песятайлэн выжыкылъёсыз» книгаез Россиысь театрын ужасьёслэн огазеяськонзы юрттэмен потӥз.

https://udmurt.media/udm/news/kultura-i-turizm/38274/