Ямало-Ненец округысь пиналъёс Кияса ёросысь Уддядиын удмурт лулчеберетэн тодматскизы
Удмурт лулчеберетъя центрлэн кивалтӥсез Елена Белослудцева вера: » Удмуртие 7-8 классъёсын тямыс дышетскисьёс но соослэн кык дышетӥсьёссы вуизы. Уддядиос куноосты гурт кузя квест-шудонэн пумитазы, экскурсия возьматӥзы но удмурт йӧскалык сиёнэн утялтӥзы. Сразу соос зымизы милям ландшафтамы. Гуртмы милям туж аспӧртэм — нюко-гопо, писпуо. Собере соку ик табанен сюдӥм, кыкетӥ нуналаз перепечен сюдӥм»
Озьы ик Удмурт центрын ужасьёс нылпиосты йӧскалык дӥсен но сюанэн герӟаськем удмурт сям-йылолъёсын тодматӥзы, перепеч кутонъя мастер-класс ортчытӥзы.
Кивалтӥсь верамъя, пиналъёс удмурт лулчеберетэн туж тунсыкъяськизы но вань ӵектэм ужрадъёсы мыло-кыдо пыриськизы.
«Мастер-класс ортчытӥськод — соос сыӵе шаплы пырисько. Асьсэос ик пыжо, асьсэос ик куарнянь лэсьто, асьсэос перепеч дур но лэсьто», — шуэ Елена Белослудцева.
Кызьы валэктӥз Удмурт лулчеберетъя центрлэн кивалтӥсез, Ямало-Ненец округысь пиналъёс Удмуртие вить нуналлы ветлӥзы. Удмурт калыкен но лулчеберетэн тодматскон ужрад дышетскисьёслэн ӵектоссы грант утэмен валче быдэсмиз. Уддядие сяна, нылпиос элькунысь каръёсы вуылӥзы. Елена Белослудцевалэн кылъёсызъя, тужгес но тунсыкоен соос Кузебай Герд нимо йӧскалык музеез пусйизы.