Мадьяр кылэз но лулчеберетэз дышетонын Удмурт кун университетлы Венгрия юрттоз
«Консул пусйиз, асме финн-угор центр, мукет финн-угор элькунъёсын ӵошатоно ке, одӥгез тужгес умоез лыдъяське, малы ке шуоно асьмелэн вань нимаз мадьяр лектормы. Солэн верамезъя, азьланяз но Венгрия юрттоз, татын лекторъёсмы мед луозы шуыса», — вера УдГУ-ысь Удмурт кылосбуръя, финноугроведения но журналистикая институтлэн кивалтӥсез Наталья Кондратьева.
Пумиськонэ люкаськемъёс пусйизы, мадьяр университетъёсын но удмурт кылэз дышето шуыса. Венгриысь тужгес бадӟымез удмурт центр интыяськемын Будапештысь Этвёш Лоранд нимо университетын, кытын 1990-тӥ аръёсысен удмурт кыллы асьме лекторъёс дышето. Со сяна, туннэ Сегедысь вузын Удмурт кун университетэз йылпумъям удмурт лектор ужа.
Удмурт кун университетын мадьяр кылэз дышетон 1970-тӥ аръёсы кутскиз. Нош 1990-тӥ аръёсы вузын нимысьтыз финн-угор ёзэт усьтӥзы. Соку ик элькунэ мадьяр лектор Иштван Козмач ужаны лыктӥз. Со дырысен мадьяр кылэз дышетон Удмурт кун университетын ялан мынэ.
«Наталья Кондратъева верамъя, удмурт-мадьяр кусыпъёсты юнматон вылысь озьы ик пӧртэм программаосъя ӵошен ӵектосъёс быдэсъялозы, Удмурт кун университетысь мадьяр киноклублы Венгриысь фильмъёсты келялозы но берыктон ужен юнгес вырозы.
Бадӟымгес саклык висъяськоз на берыктонъёс лэсьтонлы но. Талы тросгес коньдон висъямын луоз, малы ке шуоно ӵапак берыктонъёс пыр луэ тодматскыны мукет лулчеберетлэн пуш инъетэныз», — шуэ Наталья Кондратьева.
Со ватсаз, Удмурт кун университет но мадьяр вузъёс куспын студентъёсын вошъяськон но вань шуыса. Кылсярысь, кылем арын Удмуртиысь 11 дышетскисьёс Венгрие мадьяр кылэз дышетонъя гужем курсъёсы ветлӥзы. Та дыре эшшо куинез студентъёс Балинт Балаши нимо институтэ быдэс дышетскон арлы мынэмын. Со сяна, кыкез «Erasmus+» программая Сегедысь университетын дышетско.
Мадьяр студентъёс но асьме доры семестрлы яке удмурт кылъя гужем курсъёсы вуыло. Удмурт кылэз дышетонъя калыккуспо гужем школа Удмурт кун университетын дышем сямъя пӧсьтолэзе ортчоз. Кылъя курсъёс сяна, кунгож сьӧрысь вуэмъёс понна лекциос, экскурсиос, мастер-классъёс радъясько.
Тодэ вайытом, Венгрилэн Казаньын валтӥсь консулэз Удмуртие 13-14 инвожое вуылӥз. Кунсьӧр делегация элькунысь 20-лэсь трос предприятиослэн но огазеяськонъёслэн ужаменызы тодматскиз но вачеужан луонлыкъёс сярысь кенешиз.