Ойдолэ шутэтскоме!

4-тӥ инвожоысен пырак элькун Герберозь — 16-тӥ инвожоозь — уваос ӧтё ёросазы улӥсьёсыз «Удмурт дӥськутлэн арняез» акцие пыриськыны. Со понна нуналлы быдэ (яке ку мылкыд луиз ке но) уж дуре ветлоно удмурт костюмен яке кыӵе ке йӧскалык арбериен, шуом, уксётӥрлыкен, туспуксёно, нош туспуктэмъёсты интыяно «ВКонтакте»-ысь бамады. Асьмеос асьмелы мылкыдмес ӝутом но элькун Герберлы дасяськом (со туэ ӵапак Ува ёросысь Пекшурын ортчоз), шуо акциез радъясьёс.

9-тӥ инвожое Сьӧлталан ортчоз «Тетера-фест». Шонергес вераса, со ёрос Герберын одӥгез площадка луоз.

10-тӥ инвожое Можга ёрослэн Гырон быдтон праздниказ (со луоз Бадӟым Сибыын) «кенешчиос» ортчытозы «Ожо-вожо» площадка. Со улсын радъяськозы пӧртэм мастер-классъёс, учкисьёс тодозы вашкала вакытысь турнаны потон, кен пылатон но мукет йылолъёс сярысь, быгатозы отчы пыриськыны но. Со сяна, луозы экто-тыпыртонъёс, шудонъёс. Та площадка ортчоз нырысьсэ, пыриськытэк эн кыле.

11-тӥ инвожое Ярын 3-тӥзэ ортчоз «Ӟечбур, Гербер!» ёрос праздник. Быдэс ёросысь удмурт коллективъёс учкисьёсты шулдыртозы, кырӟалозы-эктозы, озьы ик радъямын луозы егитъёслы, ӵошатсконъёсын «Батыръёс» площадкаос.

11-тӥ инвожое удмурт Гырон быдтон радъяськоз Камбарка ёросысь Армязь гуртын но. Радъясьёс куное ӧтё вань мылкыд карисьёсты, тунсыко луоз, шуо.

12-тӥ инвожое вань мылкыд карисьёсты ӧтиськомы Ижкар Гербере. Котьку сямен, со ортчоз Кызьпу арамаын. Площадкаос ужалозы 11 часысен.

29-тӥ-30-тӥ инвожое Тол бабайлэн  Шарканысь резиденцияз но Петуньки гуртын быдэ вуонлы сӥзем «ЭРУ» праздник ортчоз. Ужрадэ пыриськозы егитъёслэн командаоссы. Соос возьматозы визиткаоссэс но творческой номер, пыриськозы удмурт фольклоръя квестэ.

http://udmurtkenesh.ru/udm/news/priglashaem-na-natsionalnye-prazdniki/