250 адями люкаськиз удмуртъёслэн Елабугаын ортчем конференциязы

Кырӟанэн, перепечен но вӧйын нянен пумитазы Татарстанысь удмуртъёс куноосты. Нош соос трос вуизы — 7 улосъёсысь 250 адями. Конференци, 100 ар талэсь азьло нырысетӥ удмурт ӧтчам сямен ик, ортчиз дышетсконни юртын.

«100 ар ортчыса асьмеос нош ик люкаським. Удмурт кыл нош ик чузъяське та юртын. Асьме пӧлын озьы ик вань егитъёс но аксакалъёс но», — пумитаз люкаськемъёсты «Удмурт кенеш» огазеяськонлэн тӧроез Татьяна Ишматова.

Нырысетӥ удмурт азьветлӥсьёс сярысь — со Максим Прокопьев, Трокай Борисов, Константин Яковлев, Иосиф Наговицин — нимаз докладъёс но чузъяськизы. Умой мукетыз но — тодочсиосын ӵош тодэ-ванъёссэс вераны быгатӥзы та дано адямиослэн ӵыжы-выжыоссы.

100 ар талэсь азьло сямен ик ортчем пумиськонын ӝутэмын вал туннэ нуналэн герӟаськем юанъёс. Кенешон мынӥз 6 площадкаосын. Ужъёсынызы тодматӥзы егит тодосчиос. Нимаз юан ӝутэмын вал лулчеберетъя но туризмъя. Вераськон мынӥз озьы ик анай кыллэн интыез но сое дышетон ужпумъя. Нош егитъёслэн 5 командаоссы тросэзлы тодмо «Шудком» шудонын визьзэс сыназы.

Секциын ик резолюцие пыртоно ӵектонъес но дасямын вал. Соос пӧлын — Удмуртиысь егитъёслы ӵемгес потано палэнысь егитъёс доры, ӵектосъёсын вошъяськоно. Проектъёс люкамын вань площадкаосысь. Соос огъяса кивалтӥсьёс, тодосчиос, мерлыко огазеяськонъёс дорозь вуттэмын луозы.

http://www.myudm.ru/