«Йӧно удмурт семья» нимо ужрад ортчиз Тодосчиослэн юртазы

Можга ёросысь Пазял гуртысь Кокаревъёслэн семьязы гуртазы но, ёросын но туж гажамонэсь — одӥг ужрад но соостэк уг ортчы. Спортэн яке лулчеберетэн герӟаськем праздникъёсы тыршо быдэс семьяенызы пыриськыны. Надежда но Вячеслав куинь нылъёссэс будэто, дыдыоссы понна котыр ласянь адӟем карымонэсь луо.

«Котькыӵе ужрадъёсы пыриськиськом, ӵошатсконъёсы ветлӥськом. Анае, атае дышето, возьмато, кызьы улыны кулэ», — шуэ нылзы Эвелина Кокарева.

Кокаревъёсын ӵош эшшо кык семьяез пусйизы Тодосчиослэн юртазы «Йӧно удмурт семья» данъетэн. Со Ижкарысь Ильинъёслэн но Бикузинъёслэн семьяоссы.

Семьяосты ӟечкылам сяна, ӟырдыт вераськон мынӥз туала вакытэ семья кусыпъёсты утён, юнматон сярысь но.

«Кемалась потэ вал ини семья сярысь вераськон ӝутэме. Самой секытэз ужпум — со семья, ӟеч семья кылдытон», — шуэ тодосчи Альберт Разин.

Удмурт тодосчиослэн огазеяськонзылэн кичӧлтэмезъя  «Йӧно удмурт семьяез» данъян ужрад туэ нырысьсэ ортчиз. Сое радъясьёс ужзэс азьланьтозы вуоно арын но.

http://www.myudm.ru/