«Театральная мозаика» вожвылъяськонэ 49 коллективъёс пыриськизы.

3 нунал жюрилэн ёзчиосыз но учкисьёс тодматскизы 49 коллективъёсын, дунъет сётизы 60 пала спектакльёслы. Пусйыны кулэ, спектакльёс полын кыкез удмурт кылын вал.

Шаркан ёросысь Быги гуртысь нылпиос пуктӥзы «Йырез бергатӥз — мылкыдэз лӧпкытӥз» спектакльысь одӥг люкетсэ. Соос возьматӥзы Мускоысь пияшлэсь ӵыжы-выжыоссэ утчаны потэмзэ. Валтӥсь героез Гири мурт кышномуртэз аслаз песянаеныз лыдъя, гуртэ лыктыса, выль эшъёс шедьтэ, гурт улонэ пыриське.

Ӟуч авторъёслэсь гожтэм произведенизэс анай кылэ берыктӥз Нина Беляева. Кышномурт Быги муниципал кылдытэтэн кивалтэ, ваньмон дырзэ гурт театрлы сӥзе.

«Пьесаосты берыктӥсько ке, одно ик удмурт шӧм отчы пыӵатӥсько, — шуэ Нина Беляева. — Гурт нимъёсты но анай кылын малпасько. Кемалась, куке  ужасько вал та удысын, соку туж курадӟоно вал ни материалъёсын. Собере ачим гожъяськыны дышетски,  нош бӧрысь капчи амал шедьтӥ — ӟуч пьесаосты берыктыны кутски, вот озьы шудӥськом».

Жюрилэн ёзчиосыз верало, та выллем вожвылъяськонъёслэн интызы бадӟым луэ. Коллективъёс ог-огзылэсь адӟем карыны быгато, выль сямен ужаны кутско. Жюриын дунъясьёс сӥзё — азьланяз тросгес мед луысалзы удмурт кылын спектакльёс.

«Со сярысь трос вераськиськом, уж нуиськом со бордын, — шуэ жюрилэн ёзчиез Аверьян Христофоров. — Кылсярысь, писательеслэн огазеяськонзы но со бордын ужа, драматургъёс тыршо. Фестивалез учкыса адӟиське, кивалтӥсьёс но юртто коллективъёссылы шедьтыны драматургической материал».

http://www.myudm.ru/