Удмуртилэн Тӧроез йылпумъянъёс лэсьтӥз элькун Правительстволэн ужамезлы

Кун Кенешлэн паськытатэм 5-тӥ сессияз пыриськизы министерствоослэн но ведомствоослэн, городъёслэн но ёросъёслэн кивалтӥсьёссы, ветеранъёс, шаерысьтымы дано адямиос, общественникъёс — «Металлург» культурая дворецлэн залэз быдэсак тырмиз.

— Россилэн Президентэз В. Путин Федеральной Собранилы вазиськоназ потӥз: туннэ лэсьтэм вамышмылэсь поттоз азьланьын ог дасо аръёс ӵоже улон-вылонмы, — веранзэ мытӥз Тӧро. — Та кылъёс юн герӟаськемын Удмуртиен но. Матысь дыре быдэстоно луом туж секыт но со дыре ик кулэ ужпумъёсты.

Валтӥсь ужпумъёс пӧлын: кун долгез кулэстон — туннэ со 48 миллиард 435 миллион манет. Палэнысь юрттэт возьмаса улонэз ӧвӧл, соин ик коньдон поттыны дышетсконо ас кужымен. Сыӵе куд-ог амалъёсты Тӧро ӵектӥз. Нырысетӥез — кун но муниципал служащийёслэсь лыдзэс 30 процентлы кулэстоно. Кыкетӥез — уже кутӥськымтэ кун ваньбурез луэмезъя вузано.

— Нош та чотын поттэм уксёез туж валаса кутоно, кылсярысь, сюресъёсты лэсьтонэ ик, — шуиз Тӧро. — Кылсярысь, элькунамы пырыны-потыны ярантэм 62 сюресъёс кылемын на, соосты тупатъяны бюджетын уксё ӧвӧл. Но номыр шоры учкытэк, асьмеос та интыосты туэ ар пумозь волятыны кулэ…

Ортчем ар возьматӥз: кивалтэт но калык уртче ужа ке, троссэ ужпумъёсты капчигес быдэстыны. Выль команда азе курон пуктэмын: одӥг адямилэн но вазиськонэз кылымтэ-адӟымтэ улсы медаз кыльы. Озьы ар ӵоже 12 сюрслэсь ятыр гожтэтъёс вуизы, социальной сетьёс пыр туэ гинэ 2 но ӝыны сюрс мурт вазиськиз ни.

— Со вазиськонъёс ӧвӧл герӟаськемын коньдон тырмымтэен, тросаз учыръёс тырмымтэосты палэнтыны мылкыд гинэ кулэ, — ватсаз А. Бречалов. — Кылсярысь, сюрес тымиськемын шунам лымы вуэн, сое ӧръян вылысь ливнёвкаез гинэ сузяно…

Но озьы-а, тазьы-а, котькыӵе удысъёсын азинсконъёс шӧдӥськизы. Улонэ мыр-мыр пыӵаны кутскизы «Инвестициос — Удмуртие» но «Лэсьтэмын Удмуртиын» брендъёс. Соослы луыса но тросгес инвестициос кыскемын. Асьмелэсь вузъёсмес тодыны кутскизы палэнын улӥсьёс но.

А. Бречалов котькуд удыс вылэ нимысьтыз дугдылӥзы. Ваньмаз ик — дышетон-а со, тазалыкез утён-а — пусйымонэз вань. Зэм, тазалыкез утён удыс — одӥгез висьытӥсь «пӧськымы» луэ на. Но туэ ар пумозь тыро-пыдо радъяно поликлиникаослэсь ужамзэс — ӵапак нырысетӥ юрттэт сётон удысын ӵемысь валамтэос кылдо на. Но одӥгез валтӥсез вамыш лэсьтэмын: та удысын оптимизация дугдытэмын.

Люкаськемъёс нимысьтыз кичабонъёсын пумитазы А. Бречаловлэсь гурт спортсменъёслэн тол но гужем шудонъёссы пумысен верамзэ. Тӧро шуиз:

— Куд-огезлэн верамез потэ: бюджетын коньдон ӧвӧл дыръя, оло, та шудонъёстэк но ярасал, — шуиз со. — Нош мон талы пумит! Удмуртиын кадь гурт шудонъёс быдэс Россиын ӧвӧл ни, асьмелэн со данъяськонмы! Ӟеч сямез одно азинтон: гурт спортсменъёсты пумитась районъёсы одно пуктылом спортъя дворецъёс, культурая юртъёс.

1 часлэсь ятыр кыстӥськем доклад пыр потӥз одӥг веран: ваньмыз лэсьтӥське калыклэсь улон-вылонзэ ӟечгес карон понна. Оскон вань, 2018-тӥ ар кылем арынлэсь пайдаёгес ортчоз шуыса.