Башкириын «Чеберина-2018» вожвылъяськон ортчиз 

Отчы пыриськизы Башкирилэн Янаул, Таташлы но Калтасы ёросъёсысьтыз, озьы ик Пермь улосысь Куеда ёросысь 10 чеберайёс. Соос ваньзы ик тодыны кулэ вал анай кылзэс, сям-йылолъёссэс.

— Та вожвылъяськон адӟытэ, кызьы нылъёс быгато ас кылзэс яратыны но ог-огенызы эшъяськыны. Башкириын со брендовой луиз ини но ортчылэ 2 арлы одӥг пол, — шуиз Башкириысь Удмуртъёслэн национально-культурной центрысьтызы валтӥсь специалист Ирина Самигулова. — Милесьтым адӟем карыса, туэ нырысьсэ таӵе вожвылъяськон ортчиз Пермь улосысь Бадӟым Гондыр гуртын. Ми отчы вуылӥмы, нош табере соос ми доры лыктӥзы. Анай кылынымы вераськыны но сое азинтыны туж кулэ, та ужрадмы со понна одӥгез амал луэ.

Вожвылъяськонын нылашъёс возьматӥзы сцена вылын асьсэды возьыны быгатэмзэс, вашкала удмурт дӥсез но сям-йылолъёсты тодэмзэс, пӧраны, мунё вурыны, кырӟаны-вераны быгатэмзэс.

Гран-приез басьтӥз Вуж Варяшысь Диана Насибуллина. Солэсь 1 баллы кыльыса, 1-тӥ интые потӥз Татышлы ёросысь Ника Муллаярова. 2-тӥ интыын — Янаул ёросысь Есения Хуснимарданова, нош 3-тӥын — Татышлы ёросысь Линда Гильманова. Мукетъёсыз нылъёс пӧртэм номинациосын вормисе потӥзы. Ваньзы ик соос дуно кузьымъёсын пусъемын вал.