Йӧскалык ужпумъёсты сэрттон-пертчонъя сӧзнэт ужаны кулэ муниципалетъёсын но

Ужрадэ пырисько элькунысьтымы муниципалетъёсын ужасьёс, артысь улосвылъёсысь куноос, Москваысь калык кусыпъёсъя экспертъёс. Ёросъёсын, поселениосын йӧскалык политикая огъя ужан сӧзнэтэз кылдытон пумысен форумын кенешонъёс, ужан амалъёсын люкиськонъёс мыно.

Форумлэн ужез кутсконын йӧскалык полтикая министр Лариса Буранова пусйиз — йӧскалык политикаез радъян зэмос ӧнерчиосты кулэ каре. Федерациын  та ӧрез  федерал агентсво нуэ, улосвылъёсын — йӧскалык ужпумъёсъя министерствоос. Сыӵе ик ёзэт луыны кулэ котькуд ёросъёсын но поселениосын.

«Отын но мед луоз зэмос калыккуспо политика, — шуэ Россиысь калыкъёслэн Ассамблеяенызы кивалтӥсь Светлана Смирнова. — Со понна кылдытыны кулэ одӥг сӧзнэт. Ӵапак со огъя ужан амалэз кылдытон — форумлэн валтӥсь ужпумез. Федерал катъёсъя, туннэ муниципалетъёслэн кивалтӥсьёссы йӧскалык ужпумъёсъя кылкуто. Югдур котькуд ёросын, поселениын пӧртэм.  Кытын сое валало, отын сӧзнэт юнматэмын».

Кӧня ке ар талэсь азьло йӧскалык кусыпъёсты радъян муниципалетъёс вылэ выжиз.

«Со шонер, — шуэ Росси президент бордын ужась йӧскалык кусыпъёсъя кенешлэн ёзчиез Маргарита Лянге. — Выжы калыкъёс пӧлын куд-ог валантэмъёс, ваче вуонъёс нырысь пичи интывылъёсын кылдо, бӧрысь соос улосвыл, яке нош федерал шуг-секытъёсы выжо. Соин ик соосты кенӝем интыязы ик кысыны быгатоно».

http://www.myudm.ru/