Удмурт мастер-классъёсын видеороликъёсъя интернет-конкурс ялэ «Билингва» центр пиналъёс пӧлын
«Билингва» центрлэн кивалтӥсез Татьяна Волковалэн кылъёсызъя, али пиналъёс туж трос дышетӥсь видеороликъёсты учко, нош удмурт кылын сыӵе мастер-классъёс ӧвӧл. Соин ик таӵе вожвылъяськон ортчытыны малпан кылдӥз.
«Туннэ нунал понна милям удмурт пространствоын ӧвӧл сыӵе видеороликъёс, кытын удмурт нылпиос ог-огзэс дышетысалзы мар ке но лэсьтыны, кыӵе ке но дэмланъёс сётысалзы. Милем потӥз, со туж тунсыко форма, кудӥз возьматоз удмурт кыллэсь кулэлыксэ одӥг ласянь, солэсь пайдалыксэ, мукет ласянь — нылпиос понна солэсь тунсыко луэмзэ», — шуэ Татьяна Волкова, кыккылолыкъя «Билингва» центрлэн кивалтӥсез.
Солэн верамезъя, «Билингва ТВ» интернет-вожвылъяськонэ котькыӵе темая мастер-классэн пӧртэм аресъем пиналъёс пыриськыны быгато. Ужъёсты 29-тӥ оштолэзёзь udmbilingva@yandex.ru электрон адресъя возьмало. Вуэм роликъёсты «Билингва ТВ» ютуб-каналэ интыялозы. Тужгес но устоосыз покчи видеоблогеръёс кузьымъёсын но сертификатъёсын пусъемын луозы.
Радъясь верамъя, азьланяз пиналъёслэсь видеороликъёссэс удмурт кылъя дышетӥсьёс урокъёсазы кутыны быгатозы. Конкурсэ ыстэм материалъёс анай кылэз волятыны юрттозы.
«Шуыны луоз, урокысь аудирование, ку дышетӥсь лыдӟе, со нылпиослы тунсыко ӧвӧл ӵемысь. Соин ик тани таӵе форма, мон малпамъя, со удмурт кылъя урокез тунсыкогес карыны кулэ», — валэктэ Татьяна Волкова.
Со сяна, «Билингва ТВ» мерлыко огъетэ «Нуныкай» центрын ортчем занятиосъя видеороликъёсты интыялозы. Азьланяз ютуб-каналэз узырмытон понна эшшо но конкурсъёс чакламын луозы на, шуэ «Билингва» центрлэн кивалтӥсез.
«Оло, нылпиос асьсэос мультфильмъёс кылдытозы, туж трос роликъёс кыӵе ке но пайдалыко. Оло, нылпиос асьсэос дэмлалозы пӧртэм формаос. <…> Со сяна, ми «Билингва» каналын эшшо интыялом на «Нуныкай» центрамы ортчытэм занятиосъя лэсьтэм роликъёсмес. Озьыен, татын луозы роликъёс, кытын бадӟымъёс нылпиосты марлы ке но дышето, кылсярысь, киужлы. Мукет ласянь луозы роликъёс, кытын пичиос дышето нылпиосты», — шуиз Татьяна Волкова.