Эгра ёросысь Сеп гурт нош бадӟымесь воштӥськонъёслы дасяське

Огъя студентъёс 4 проектъёссэс ӵектӥзы. Ваньзы соос удмурт шӧмъя быдэстэмын, шуыны луоз.

«Мон малпасько, студентъёс лэсьтӥзы сыӵе ужъёс, милям калыклы мед тупалоз шуыса, — вера Эгра ёросысь Сеп муниципал кылдытэлэн тӧроез Павел Перевощиков. — Соин ик ми быръёмы милемлы тужгес но кельшымонзэ. Та проектэнымы ми гуртамы тросгес туристъёсты кыскыны малпаськом. Мед лыктозы татчы калыкъёс шутэтскыны».

Егит архитекторъёс но дизайнеръёс ӵектосъёссы бордын ар пала ужазы. «Культурный квартал деревни Сеп» проект президент грантъёсын фондлэн коньдонэныз улонэ пыӵа. Нырысь-валысь, одӥг азбар гинэ кылдытон сярысь вераськонъёс вал. Нош кичӧлтӥсьёслэн мылкыдзыя, воштӥськонъёс быдэс гуртлэсь тусбуйзэ выльдыны кулэ.

«Быдэстэм ужмы мед возьматоз пуштроссэ Сеплэсь, солэсь чеберлыксэ, калыкмылэсь данзэ, — шуэ Эгра ёросысь Сепысь лулчеберетъя юртэн кивалтӥсь Татьяна Мосова. — Гуртъёс медам бырылэ, мед соос улӟозы, мед егитъёс татчы лыктозы. Милям сыӵе лэсьтэммы потэ та гуртэз, мед вожъяськозы, мед карысь калык улыны лыктоз гуртэ».

http://www.myudm.ru/