«Бадӟым удмурт диктантэз» гожтон интыос тодмо луизы Ижкарын

«Мынам Удмуртие» телерадиокомпанилэн эфираз акциез одӥгез радъясь Сергей Касаткин кылъёсызъя, акцие мыло-кыдо пырисько элькунысь уйпал ёросъёс. Озьы диктантэз гожтон инты Глазкарысь пединститутын радъяськоз. Со сяна, Можгаысь педколледжын но площадка ужалоз.

«Бадӟым удмурт диктантэ» дэмен пыриськыны ёросъёсын но быгатозы. Ужрадэз ортчытон сярысь валатэт (положение) Удмуртиысь котькуд муниципалитетлэн центраз но мукет улосвылъёсын удмуртъёс тросэн улон интыосы келямын. Площадка радъян сярысь ивортонзэс ужъюртъёс радъясьёслы 15-тӥ южтолэзёзь ыстыны кулэ.

Тодэ вайытом, «Бадӟым удмурт диктант» туэ 31-тӥ южтолэзе ортчоз, кутсконэз Ижкарысь дыръя 13 часын (Москва дыръя 12 часын). Ваньмаз площадкаосын Кузебай Гердлы сӥзем одӥг текстэз лыдӟозы, сое тодосчи Александр Шкляев гожтоз. Нимысьтыз радъям интыосы мыныны быгатӥсьтэмъёслэн дорысьтызы потатэк асьсэды эскерыны луонлыксы вань, 13 часысен ик текстэз «Мынам Удмуртие» радиолэн меӵак эфираз лыдӟозы.

Диктантлэсь текстсэ, ужъемышъёсты (результатъёсты) но ӵемгес пумиськылӥсь янгышъёсын ивортонэз ужрадлэн «ВКонтакте» вотэсысь бамаз, озьы ик радъясьёслэн но юрттӥсьёслэн нимлыко сайтъёсазы 30-тӥ оштолэзёзь шараялозы. Рос-прос йылпумъянъёс лэсьтозы 1-тӥ инвожоозь.

Ватсалом, туэ «Бадӟым удмурт диктант» акциез «Мынам Удмуртие» телерадиокомпания но УдГУ-ысь Удмурт кылосбуръя, финно-угроведениея но журналистикая институт элькунысь Йӧскалык политика министерство но «Удмурт Кенеш» огазеяськон юрттэмен ортчыто.

Ивортодэтъя «Удмуртия» агентстволэн сайтысьыз басьтэмын: https://udmurt.media/udm/news/obshchestvo/33073/