Выль сямен ужзэ кутскиз туэ кыккылолыкъя «Билингва» удмурт центр

Семинаре лыктэм анай-атайёс пиналъёссэс «Нуныкай» центрысь ӧнерчиослы оскизы. Нылпиос таяз учыре пӧртэм выжы семьяосысь ке но вуизы, визьнодасьёс соосын удмурт кылын вераськизы. Ӟуч кылэ выжыны муг ӧй вал — семинаре вуэм армян, азербайджан но мукет выжыысь семьяосысь нылпиос ваньмаз ик удмурт кылэз тодо.

Наринэ Манукян 3 кыл тодэ — ӟуч, армян но удмурт. Семьязы али Вавожын улэ. Кызьы армян семьяын анай кылзы возиське но маин со юрттэ — асьсэлэн улонысьтызы учыръёссы сярысь туж мыло-кыдо веразы анай-атайёс. Соосын кенешем бере , куд-огез мур малпаськонъёсын семинарысь кошкизы.

«Туж возьыт луиз, — шуиз одӥгез анай Любовь Михайлова. — Семьяямы туж ӧжыт вераськиськомы удмурт кылын. Нылпиосмы, гуртэ бертыса, верасько удмурт кылын, нош садикын ӟуче выжо. Нош ми, анай-атайёс, соосын ӵош кутскиськом вераськыны ӟуч кылын».

Азьланяз «Билингва» центрын ужась ӧнерчиос семинарзэс радъялозы анай-атайёслэн дэмланъёссы, сюлэмшугъяськонъёссы вылэ пыкиськыса. Анай-атайёсты сяна, семинаръёс люкалозы на ёросъёсысь визьнодасьёсты но кык кылэз тодӥсь нылпиосын ужась ӧнерчиосты.

«Асьме специалистъёс тыршозы дышетыны, кызьы шонер ужано кык кылэз тодӥсь нылпиосын. Сыӵе амалъёсты вералозы,со кык кылолык семья пушкын зэмзэ но мед утиськоз шуыса», — вераз кыккылолыкъя «Билингва» удмурт центрлэн кивалтӥсез Татьяна Волкова.

http://www.myudm.ru/