Иван Белослудцев этнокырӟанъя конкурсэ пыриське

Егит артист Россиысь 11 улосъёсысь усточиосын вожвылъяськоз. Ужрадын чакламын 2 вормисьёс — жюриен быръем но тужгес трос смс-куараос люкам кырӟасьёс.

Иван Белослудцев калык кырӟанъёсты быдэстонъя вожвылъяськонэ «Шуд» нимо уженыз пыриське. Телесъёмкаос ортчизы ни. Вормисьёсты быръёзы эфир потэм бере.

Ватсаса: ужрадлэн узыр кузьымъёсыз. Нырысетӥ кык вормисьёс ӝыны миллион манет утозы, нош 3-тӥ, 2-тӥ но 1-тӥ инты басьтэм лауреатъёс 100-ысен 300 сюрс манет басьтозы.

Вожвылъяськон-концертэз учкыны но Иван Белослудцев понна куара сётыны луоз 17-тӥ толшоре «Удмуртия» телеканалын. Эфир кусткоз 18 часын.

«Биир кун» конкурсэз радъяло Якутскысь эстрадая театр но иворъёсты волмытонъя «Саха» йӧскалык компани Якутиысь лулчеберетъя министерство юртэмен.

http://www.myudm.ru/