Сарапулысь украин лулчеберетъя центр 10 ар тырмонзэ пусйиз  

Мар бордысен ужзэ кутскиз украин лулчеберетъя центр? Вера солэн кивалтӥсез Людмила Охотникова: «Одӥг пол удмурт центлэн ужрадаз шеди. Соку валай, татчы люкаськемъёс асьсэ лулчеберетсэс азинтон мылкыдын уло: ас кылынызы верасько, йӧскалык кыӟанъёсты быдэсто. Соку ик мынам но мылкыды ӝутӥськиз асьме центрмес кылдытон пумысен. Табере тани 10 ар ӵоже ини татын улӥсь украинецъё валче кариськыса улӥськом: пумиськонъёс ортчытылӥськом, концертъёс возьматӥськом».

Центрлэн ёзчиосыз  Удмуртиысь йӧскалык политикая министерстволэн, украин лулчеберетъя «Громада» элькун огазеяськонлэн, Сарапул ёрос администрацилэн данъян грамотаосынызы, таукаронъёсынызы пусйылэмын.

Юбилей ӝытын но нимысьтыз саклык висъямын вал калыккуспо «Супербабушка» но «Мисс Содружество» проектъёсы, «Город Солнца» но «Прикамские перезвоны» фестивальёсы пыриськемъёс. Озьы ик украин поэтъёслэсь кылбуръёссэс лыдӟонъя конкурсъёсын вормисьёс.

Пумиськонын украин кырӟанъя «Свитанок» ансамбльысь артистъёс калыке вӧлмем украин кырӟанъёсты быдэстӥзы. Люкаськемъёсты ӟечкылазы ӧтем куноос – Ижкарысь «Славянские напевы» коллектив.