Тупал удмуртъёс Выль арез пумитазы

Ижкарысь Егитъёслэн юртазы «Выль ар саламъёс» концерт ортчиз. Сцена вылэ потӥзы Татарстанысь, Башкортостанысь, Киров, Свердловск улосъёсысь но Пермь шаерысь егит усточиос — асьсэ палась крезьгурчиослэсь кырӟанъёссэс быдэсъясьёс.

Ужрадлэн валтӥсь мугез – шаермылэн палэназ улӥсь удмурт  кырӟасьёсты шараян, калыке поттон. Озьы асьсэлэсь эстрада быгатонлыкъёссэс 14 кырӟасьёс возьматӥзы. Пӧлазы вал Удмуртиысь тодмо кырӟасьёс но, со — Людмила Ахтариева, Ксения Ахметханова.

«Сыӵе ӟеч концертэн ми, тупал удмуртъёс, ӵошен выль ар пумитам, — вера концертэз нуись Юргис Алексеев. — Шумпотӥськом, сцена вылэ потыны мылкыд карисьёс вазиськизы шуыса. Кузь сюресэз вакчи карыса лыктӥзы Удмуртие. Ужрад ортчем бере ваньмылэн сыӵе малпанмы кылдӥз – таӵе концерт арлы быдэ ортчытъяны».