Бесерман лулчеберетъя нырысетӥ ёроскуспо нылпи фестиваль ортчиз Ярын 

«Фестиваль радъяськиз бесерман лулчеберетэз утён но вӧлмытон понна, малы ке шуоно милям вань гуртъёсмы, кытын бесерманъёс уло», — шуиз Яр ёросысь лулчеберетъя юртысь ивортодэтъя но методикая ёзэтэн кивалтӥсь, ужрадэз одӥгез радъясь Светлана Шутова.

Фестивале Яр, Глаз но Юкаменск ёросъёсысь ог 500 адями люкаськиз, соос пӧлысь 150 палаез — пиналъёс.

Яр ёросысь лулчеберетъя юртысь ивортодэтъя но методикая ёзэтлэн кивалтӥсез ивортэмъя, фестиваль улсын бесерман нылпи коллективъёсын концерт, Ярысь историяя но шаертодонъя музеен радъям «Пиналъёсын корка шулдыр» адӟытон но Ярысь чеберлыко киужъёсъя центрен радъям «Бесерман мотивъёс» мастер-классъёс ортчизы. Со сяна, пиналъёс бесерман шудонъёсын шудӥзы но выль ӝук сиизы.

«Бесерман нылпи коллективъёс, соос кыстӥсько, соослы со туж тунсыко. Нош учкисьёс пӧлысь пиналъёслэсь юаськод ке, соослы тунсыко учкыны нылпиос шоры, со мар ке но аспӧртэмлыкоез», — пусйиз Светлана Шутова.

Солэн верамезъя, нылпиослы бесерман лулчеберетъя фестиваль азьланяз но ортчытъяськоз.

Тодэ вайытом, бесерман калыклэн улон-вылонэныз Егитъёслэн нырысетӥ финн-угор экспедициязы пыриськисьёс но тодматскизы. Соос Балезино ёросысь Юнда бесерман гуртэ вуылӥзы. Отын егит эскерисьёс йӧскалык дӥсен, кырӟанъёсын тодматскизы, сиён-юонэз веръязы.

Туспуктэмъёс татын:  https://vk.com/away.php?utf=1&to=https://vk.com/a..

http://udmurt.media/udm/news/kultura-i-turizm/28608/