Йӧскалык егитъёслэн улосвылкуспо дышетскон сессизы ужаны кутскиз

Дышетскон сессия 3-тӥзэ ортчытӥське. Туннэ со усьтӥськиз Ижкарысь Калыкъёслэн  Эшъяськон юртазы. Егитъёслы сӥзёнъёсын вазиськизы Удмуртиысь йӧскалык политикая министр Лариса Буранова, Калыкъёслэн  Эшъяськон юртсылэн кивалтӥсез Татьяна Боталова, «Вместе» огазеяськонлэн координаторез Мария Царёва но мер проектъёсъя федерал эксперт Сергей Тетерский.

Сессие 9 улосвылъёсысь йӧскалык лулчеберетъя огазеяськонъёслэн азьветлӥсьёссы, ӧнерчиос вуизы: Марий-Элысь, Башкортостанысь, Алтайысь, Свердловск но Киров улосвылъёсысь, Ямало-Ненец но Ханты-Мансийск автоном округъёсысь, Камчаткаысь но Удмуртиысь.

Сессилэн нырысетӥ нуналаз ик пӧртэм пумиськонъёс, кенешонъёс ортчизы но ортчозы: ӵектонъёсъя «Этно – не секретно» ярмарка, Сергей Тетерскийен вераськон, «Мировое кафе» площадкаын кенешон, Россиын улӥсь калыкъёслэн эктонъёсынызы тодматскон ӝыт.

Сессилэн ужан радлыкеныз тодматскыны луоз татын.