Штанигуртын усьтӥськиз удмурт семьяослы сӥзем «Шудбур» клуб

Ужрадэ мыло-кыдо пыриськизы анайёс, песянайёс но нылпиос.

Ваньзы соос анай кылмес дышетыны, удмурт культураен, сям-йылолъёсын тодматскыны мылкыдзэс веразы. Клубен кивалтӥсе быръемын Марина Наговицына. Та адӟем карымон кышномурт нылпиоссэ удмуртсэ гажаны, яратыны дышетэ. Семьяязы соос анай кылынызы верасько. Та сяна, Марина туж чебер кырӟа, киужен выре, пӧртэм вожвылъяськонъёсы пыриське: 2016-тӥ арын «Чеберина» конкурсын быгатонлыкъёссэ возьматӥз. Нош Вероника нылыз «Пичи батыр но чеберай» ӵошатсконын устоосыз пӧлын вал.

Клубез усьтонэ лыктэмъёс гуртын улэм-вылэмзы сярысь веразы, удмурт сям-йылолъёсты тодазы вайизы, кырӟазы-эктӥзы. Мӧзмыт ӧй вал нылпиослы но, соосын шудӥз Лӧпшо Педунь. Пичиос удмурт кылъёсты тодазы вайизы, удмурт сямен лыдъяськизы. Таӵе пумиськонъёс азьланяз но тунсыкоесь но пайдаёесь мед луозы шуыса, «Удмурт нылкышно кенешлэн» нимыныз Елена Ледянкина Марина Наговицыналы удмурт сям-йылолъёс но семья праздникъёс сярысь сценарийосын бичет кузьмаз. Марина вераз, кызьы радъямын луоз клублэн ужез. Солэн бадӟым мылкыдыз штанигуртъёсты удмурт калык сям-йылолъёсын мургес тодматыны. Умой луысал удмуртылкез азинтыны киужен вырон сямен но, уката гуртын кибашлыос трос. Пайдаё луысалзы тунсыко адямиосын пумиськонъёс, сиён-юон пӧранъя мастер-классъёс, адӟытонъёс.

Вуоно пумиськонзы сярысь но кенешизы ни. Сое сӥзёзы Анайлэн нуналэзлы. Нылпиослы но анай-атайёслы таӵе пумиськон туж яраз бере, кутскем ужез одно ик азинтоно.