Удмурт кылъя курсъёс: Пуштрос борды тус

Ижысь — ёросъёсы

Курсъёслэн выжызы кошке кыдёкысь 2000-тӥ аръёсы. Ӵапак соку Ижын удмурт кылъя нырысетӥ кружокъёс радъяськыны кутскизы. Нош 2008-тӥ арын удмурт кылъя дышетӥсьёслэн «Выжы» ассоциацизы  Нациосын ужан политикая министерствое вазиськиз, озьы кылдӥзы удмурт кылъя курсъёс, соос радъясько сӥзьыл но тулыс. Аръёс ортчыса, Ижын вордскем проект кӧчиз ёросъёсы. Туэ 12 дышетскон интыос усьтэмын ке, 7-ез соос пӧлысь ужалозы ёросъёсын.

Но, жаляса верано, куд-ог ёросъёсын уж чырмыт уг нуиськы — ӧвӧл дышетӥсьёс. Кылсярысь, кылем арын Вавожын 2 группа люкаськиз —  со  50 адями, туэ нош отын курсъёс уг усьтӥсько, удмурт кылэз дышетыны мылкыд карисьёс вань ке но.

— Удмурт кылъя курсъёсты нуон — капчи уж ӧвӧл. Лумбыт тыршемез бере дышетӥсьлы ӝытсэ но берозь кылёно луэ на — жадёно но, дунъясез но ӧжыт. Соин ик удмурт кылъя курсъёсты нуо анай кылзы понна вань сюлмынызы висись адямиос, — шуэ «Выжы» ассоциацилэн кивалтӥсез Ангелина Решетникова.

Ижысь калык удмурт кылъя курсъёсы туж мыло-кыдо мынэ. Шоркарын соос ортчо Эшъяськон юртын, Удмурт кун университетын, К. Герд нимо гимназиын, Гуманитарной лицейын но Ф. Васильев нимо библиотекаын. Азьвыл аръёсы Ижлэн шорсюлмаз улӥсьёс лыкто вал Удмурт театре — туэ та инты ворсаськиз.

Кылем арын кадь ик, удмурт кылэз дышетозы Глазовын, Можгалан, Гракын, Эгралан, таос борды туэ гинэ итӥськизы Сарапул, Балезино но Ува.

3 толэзь интые — быдэс ар

Удмурт кылэз дышетыны мылкыд карисьёс трос — шаерамы гинэ ӧвӧл, быдэс дуннеын.  Та сярысь верало уно пӧртэм курсъёс — «Яратоно удмурт кыл» но Удмурт кун университет бордын ужась гужем школаос. Кызьы вера  «Яратоно удмурт кыл» лагерьлэн кивалтӥсез Евгения Лекомцева, адямиос валало,  лагере трос тунсыко адямиос люкасько шуыса. Соин ик татчы вуо егитъёс но, быдэ вуэмъёс но, кунгожсьӧръёс но — соослэн потэ удмурт кылэз дышетэмзы но адӟемзы, кызьы уло удмуртъёс.

Озьы ке но та выллем лагерьёс, курсъёс бадӟым пайда уг ваё, уго нимаз ужало. Тросэз адямиос кылэз дышето но собере вунэто. Уго курсъёс 3 толэзь гинэ кыстӥсько, собере вераськыны нокинэн.

— Чебер льӧль малпанмы вань: курсъёсы ветлэмъёс понна  клуб выллем кылдытоно, отын соос удмурт кылзэс азьланяз но волятыны мед быгатозы. Вуоно аръёсы малпаськом анай-атайёслэсь но куронъёссэс чакланы. Шуом, анайёссы удмурт кылэз дышетыку, нылпиос кылэн шудон пыр тодматскозы, — вера Нациосын ужан политикая министерствоысь Елизавета Ложкина.

Со сяна, удмурт кылъя курсъёслэн ӧвӧл туссы (имиджзы). «Намер» студилэн кивалтӥсез Иван Кабышев шуэ, али удмурт курсъёслэн кыӵе ке син азе пуксьымон туссы ӧвӧл, со кылдэ пӧртэм проектъёс пыр.   Нош курсъёслэн туссы луиз ке, со калык пӧлын но тодмамон луоз. Та сярысь сюлмаськыса, «Намер» студия кылем толэзе  котырес ӝӧк люказ. Отын пумиськизы азьветлӥсьёс, дизайнеръёс, удмурт кылъя дышетӥсьёс но кивалтӥсьёс. Тус бордысь, валамон, вераськон мукет шуг-секытъёсы но выжиз: удмурт курсъёсты нуись дышетӥсьёслы нимысьтыз семинар радъяно, кыллюкамъёс поттано…

— Кылдытоно нимысьтыз инты, кытын огазеяськысалзы удмурт кылэз дышетонъя вань проектъёс: удмурт кылъя лагерь, удмурт кылын вераськонъя клуб но анайёслэн пумиськонъёссы, — вера  Евгения Лекомцева.